ചെന്നൈ : ലോക്സഭാ തെരഞ്ഞെടുപ്പിലെ കനത്ത തോല്‍വിക്ക് പിന്നാലെ, തമിഴ്‌നാട് ബിജെപി അധ്യക്ഷനും മുൻ ഐപിഎസ് ഉദ്യോഗസ്ഥനുമായ കെ അണ്ണാമലൈ വിദ്യാഭ്യാസത്തിനായി ബ്രിട്ടനിലേക്ക് പോകുന്നതായി റിപ്പോർട്ട്. ഇന്ത്യൻ എക്സ്പ്രസാണ് വാർത്ത പുറത്തുവിട്ടത്. ഫെലോഷിപ്പിന് വേണ്ടിയാണ് അണ്ണാമലൈ യുകെയിലേക്ക് പോകുന്നതെന്ന് റിപ്പോർട്ടില്‍ പറയുന്നു. മൂന്ന് മാസത്തെ കോഴ്സിന് വേണ്ടിയാണ് അദ്ദേഹം ബ്രിട്ടനിലേക്ക് തിരിക്കുന്നത്. എന്നാല്‍, ഇക്കാര്യം അണ്ണാമലൈ സ്ഥിരീകരിച്ചിട്ടില്ല.
കഴിഞ്ഞ ലോക്സഭ തെരഞ്ഞെടുപ്പില്‍ അണ്ണാമലൈയുടെ നേതൃത്വത്തിലുള്ള ബിജെപി തമിഴ്നാട്ടില്‍ കനത്ത തിരിച്ചടിയാണ് നേരിട്ടത്. ഒരുസീറ്റ് പോലും ബിജെപിക്ക് നേടാനായില്ല. തെരഞ്ഞെടുപ്പ് പ്രചാരണത്തിന് വേണ്ടി രണ്ടുതവണയാണ് പ്രധനമന്ത്രി നരേന്ദ്രമോദി സംസ്ഥാനത്തെത്തിയത്. എന്നാല്‍, അണ്ണാമലൈ മത്സരിച്ച കോയമ്ബത്തൂരില്‍ പോലും ദയനീയ പ്രകടനമാണ് ബിജെപി നടത്തിയത്. അണ്ണാമലൈക്ക് സംസ്ഥാന അധ്യക്ഷ പദവി നല്‍കിയതില്‍ പാർട്ടിയിലെ മുതിർന്ന നേതാക്കളുടെ എതിർപ്പ് അവഗണിച്ചാണ് കേന്ദ്ര നേതൃത്വം തീരുമാനമെടുത്തത്. എന്നാല്‍, അണ്ണാമലൈ ഒളിച്ചോടുകയാണെന്ന് രാഷ്ട്രീയ എതിരാളികള്‍ ആരോപിച്ചു.
