നോബോളിൽ കുടുങ്ങി തോറ്റു വീണ് രാജസ്ഥാൻ..! അവസാന പന്തിലെ നോബോൾ കുരുക്കിൽപ്പെട്ടു രാജസ്ഥാനു തോൽവി

ജയ്പൂർ: സ്വന്തം മൈതാനത്ത് അവസാന പന്തിലെ നോബോളിൽ തോൽവി വഴങ്ങി രാജസ്ഥാൻ. അവസാന ഓവർ വരെ വിജയപ്രതീക്ഷയുണ്ടായിരുന്ന രാജസ്ഥാനാണ് ഇപ്പോൾ അവസാന സ്ഥാനക്കാരായ ഹൈദരാബാദിനോടു തോറ്റിരിക്കുന്നത്.
സ്‌കോർ
രാജസ്ഥാൻ -214/2
ഹൈദരാബാദ് -217/6

ടോസ് നേടിയ രാജസ്ഥാൻ റോയൽസ് ബാറ്റിംങ് തിരഞ്ഞെടുക്കുകയായിരുന്നു. മോശം ഫോമിലായിരുന്ന ജോസ് ബട്‌ലർ ആദ്യം തട്ടിയും മുട്ടിയും കളിച്ചപ്പോൾ, ആക്രമിച്ചു കളിക്കുകയായിരുന്നു യശസ്വി ജയ്‌സ്വാൾ. പവർപ്ലേയിൽ ആക്രമിച്ചു കളിച്ച യശസ്വി 18 പന്തിൽ അഞ്ചു ഫോറും രണ്ടു സിക്‌സും പറത്തി 35 റണ്ണാണ് അടിച്ചെടുത്തത്. നാല് ഓവർ പൂർത്തിയായപ്പോൾ 54 റണ്ണുമായി ജയ്‌സ്വാൾ പുറത്തായ ശേഷം എത്തിയ സഞ്ജുവും (പുറത്താകാതെ 66) ജോസ് ബട്‌ലറും (59 പന്തിൽ 95) ചേർന്ന് മികച്ച ബാറ്റിംങാണ് രാജസ്ഥാന് സമ്മാനിച്ചത്. രണ്ടു പേരും ചേർന്ന് 138 റണ്ണാണ് രണ്ടാം വിക്കറ്റിൽ അടിച്ചു കൂട്ടിയത്.

മറുപടി ബാറ്റിംങിനായി ഇറങ്ങിയ ഹൈദരാബാദിനായി അൽമോപ്രീതും (33), അഭിഷേക് ശർമ്മയും (55) മികച്ച തുടക്കമാണ് നൽകിയത്. ചഹലിന്റെ പന്തിൽ അമോൽപ്രീതിനെ ഹേറ്റ്‌മേർ ക്യാച്ച് എടുത്ത് പുറത്താക്കിയതോടെയാണ് രാജസ്ഥാൻ ആരാധകർക്ക് ആശ്വാസമായത്. പിന്നാലെ ഇറങ്ങിയ രാഹുൽ ത്രിപാതി (47) രാജസ്ഥാൻ ആരാധകരുടെ നെഞ്ചിൽ തീ കോരിയിട്ടുള്ള വന്യമായ ആക്രമണമാണ് നടത്തിയത്. ഇതിനിടെ ആക്രമണം കടുപ്പിച്ച അഭിഷേകിനെ പുറത്താക്കി അശ്വിൻ രാജസ്ഥാനെ മുന്നിലെത്തിച്ചു. ത്രിപാതിയെയും ക്ലാസനെയും (26) പുറത്താക്കി ചഹൽ വീണ്ടും രാജസ്ഥാന് മൂൻതൂക്കം നൽകി. ആക്രമണത്തിന് കോപ്പ് കൂട്ടിയെത്തിയ മാക്രത്തെ (6) വീഴ്ത്തിയ ചഹൽ വീണ്ടും പ്രതീക്ഷകളുടെ നിലവിളക്ക് തെളിയിച്ചു.

അടി ഭേഷാ വാങ്ങിക്കൂട്ടിയെങ്കിലും കിട്ടിയ അവസരത്തിൽ അക്രമകാരിയായ ഗ്ലെൻ ഫിലിപ്‌സിനെ ഹേറ്റ്‌മേറിന്റെ കയ്യിൽ എത്തിച്ച് യാദവും ക്യാപ്റ്റന്റെ വിശ്വാസം കാത്തു. അവസാന ഓവറിൽ 17 റൺ വിജയിക്കാൻ വേണ്ട ഹൈദരാബാദിനെ സന്ദീപ് ശർമ്മയുടെ ആദ്യ പന്തിൽ ലഭിച്ച ക്യാച്ച് താഴെയിട്ടത് സമ്മർദത്തിലാക്കി. അവസാന പന്തിൽ സന്ദീപ് ശർമ്മയുടെ പന്തിൽ സമദ് പുറത്തായെങ്കിലും, നാടകീയമായി നോബോൾ വിളിച്ചത് കളിയെ വീണ്ടും അവസാന പന്തിൽ നാല് എന്ന നിലയിലേയ്ക്കു നീട്ടി. കിട്ടിയ ഫ്രീഹിറ്റ് അടിച്ചു പറത്തിയ സമദ് ഹൈദരാബാദിനെ വിജയത്തിലേയ്ക്കു അടിച്ചു പറപ്പിച്ചു.