സ്പോർട്സ് ഡെസ്ക്ക് : ബംഗളുരുവിലെ ശ്രീകണ്ഠീരവ സ്റ്റേഡിയത്തിലെ നിറഞ്ഞ കാണികള്‍ക്ക് മുന്നില്‍ പാകിസ്ഥാനെ തകര്‍ത്ത് ഇന്ത്യ സാഫ് കപ്പിന് ഉജ്ജ്വല തുടക്കം കുറിച്ചു.എതിരില്ലാത്ത നാല് ഗോളിനായിരുന്നു ഇന്ത്യയുടെ വിജയം. ഇന്ത്യക്കായി ക്യാപ്റ്റൻ സുനില്‍ ഛേത്രി ഹാട്രിക്ക് നേടി.
ആവേശകരമായ പോരാട്ടത്തില്‍ പാകിസ്ഥാനെതിരെ വ്യക്തമായ ആധിപത്യമാണ് ഇന്ത്യ പുലര്‍ത്തിയത്. പത്താം മിനിറ്റില്‍ പാക് ഗോളി സാകിബ് ഹനീഫിന്റെ പിഴവ് മുതലാക്കിയാണ് ഛേത്രി ആദ്യ ഗോള്‍ നേടിയത്. ആറ് മിനിറ്റിന് ശേഷം പെനാല്‍റ്റി വലയിലെത്തിച്ച്‌ ഛേത്രി ഗോള്‍ നേട്ടം രണ്ടാക്കി. പിന്നീട് 74-ാം മിനിറ്റില്‍ ഒരിക്കല്‍ കൂടി പാക് ഗോള്‍വല ചലിപ്പിച്ച്‌ ഛേത്രി ഹാട്രിക്ക് പൂര്‍ത്തിയാക്കി. ആറ് മിനിറ്റുകള്‍ക്ക് ശേഷം ഉദാന്ത സിങ് ഒരു ഗോള്‍ കൂടി നേടിയതോടെ ഇന്ത്യയുടെ വിജയം പൂര്‍ത്തിയായി.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
അതേസമയം മത്സരം ആദ്യ പകുതിക്ക് പിരിയുന്നതിന് തൊട്ടുമുൻപ് ഇരൂടീമും കൊമ്പുകോര്‍ത്തു. പാക് താരത്തിന്റെ ത്രോ ഇൻ ഇന്ത്യൻ പരിശീലകൻ ഇഗോര്‍ സ്റ്റിമാച്ച്‌ തടസപ്പെടുത്തിയതാണ് പ്രശ്നങ്ങള്‍ക്ക് കാരണം. ഇതിനുപിന്നാലെ സ്റ്റിമാച്ച്‌ ചുവപ്പുകാര്‍ഡ് കണ്ടു. ശനിയാഴ്ച നേപ്പാളിനെതിരെയാണ് ഇന്ത്യയുടെ അടുത്ത മത്സരം.
