സെഞ്ചൂറിയന്‍: ദക്ഷിണാഫ്രിക്കക്കെതിരായ മൂന്നാം ടി20ക്ക് മുമ്പ് മലയാളി താരം സഞ്ജു സാംസണിന്‍റെ 30-ാം പിറന്നാള്‍ ആഘോഷമാക്കി ടീം ഇന്ത്യ. മൂന്നാം ടി20ക്കായി സെഞ്ചൂറിയനിലെ സൂപ്പര്‍സ്പോര്‍ട് പാ‍ർക്കിലേക്ക് ടീം ബസില്‍ പോയ ഇന്ത്യൻ താരങ്ങള്‍ ടീം ബസില്‍വെച്ചുതന്നെ സഞ്ജുവിന്റെ പിറന്നാള്‍ ആഘോഷം തുടങ്ങിയിരുന്നു. പിന്നീട് ടീം താമസിക്കുന്ന ഹോട്ടലിലെത്തിയശേഷം താരങ്ങളും കോച്ച്‌ വിവിഎസ് ലക്ഷ്മണും അടക്കമുള്ളവര്‍ പങ്കെടുത്ത പിറന്നാള്‍ ആഘോഷത്തില്‍ സഞ്ജു കേക്ക് മുറിച്ചു.
നാളെയാണ് ഇന്ത്യ-ദക്ഷിണാഫ്രിക്ക ടി20 പരമ്പരയിലെ മൂന്നാം മത്സരം. ആദ്യ മത്സരം ഇന്ത്യ സഞ്ജുവിന്റെ സെഞ്ചുറി കരുത്തില്‍ അനായാസം ജയിച്ചപ്പോള്‍ രണ്ടാം മത്സരത്തില്‍ ഇന്ത്യ തോറ്റു. സഞ്ജു അടക്കമുള്ള മുന്‍നിര രണ്ടാം മത്സരത്തില്‍ നിരാശപ്പെടുത്തിയപ്പോള്‍ ഇന്ത്യ 124 റണ്‍സില്‍ ഒതുങ്ങിയെങ്കിലും ഏഴ് വിക്കറ്റ് നഷ്ടത്തിലാണ് ദക്ഷിണാഫ്രിക്ക ലക്ഷ്യത്തിലെത്തിയത്.
