സ്പോർട്സ് ഡെസ്ക്ക് : സയ്യിദ് മുഷ്താഖലി ട്രോഫിയില്‍ കേരളം അവരുടെ മികച്ച പ്രകടനം തുടരുന്നു. ഇന്ന് സിക്കിമിനെതിരെ കൂടെ വിജയിച്ച്‌ കേരളം തുടര്‍ച്ചയായ അഞ്ചാം ജയം സ്വന്തമാക്കി.ഇന്ന് 132 റണ്‍സിനാണ് കേരളം വിജയിച്ചത്. കേരളം ഉയര്‍ത്തിയ 222 എന്ന വിജയലക്ഷ്യം പിന്തുടര്‍ന്ന സിക്കിം വെറും 89/9 റണ്‍സ് എടുക്കാനെ ആയുള്ളൂ. 26 റണ്‍സ് നേടിയ അങ്കുര്‍ സിക്കിമിന്റെ ടോപ് സ്കോറര്‍ ആയത്. കേരളത്തിനായി മനു കൃഷ്ണൻ, സിജോമോൻ, മിഥുൻ പി കെ എന്നിവര്‍ രണ്ടു വിക്കറ്റ് വീതം വീഴ്ത്തി. വൈശാഖ് ചന്ദ്രൻ, സുരേഷ് എന്നിവര്‍ ഒരു വിക്കറ്റു വീതവും വീഴ്ത്തി.
ഇന്ന് സിക്കിമിന് എതിരെ ആദ്യം ബാറ്റു ചെയ്ത കേരളം രോഹൻ എസ് കുന്നുമ്മലിന്റെയും വിഷ്ണു വിനോദിന്റെയും കരുത്തില്‍ 20 ഓവറില്‍ 3 വിക്കറ്റ് നഷ്ടത്തില്‍ 221 റണ്‍സ് എടുത്തിരുന്നു. രോഹൻ എസ് കുന്നുമ്മല്‍ 56 പന്തില്‍ നിന്ന് 101 റണ്‍സ് എടുത്ത് പുറത്താകാതെ നുന്ന് കേരളത്തിന്റെ ടോപ് സ്കോറര്‍ ആയി. 2 സിക്സും 14 ഫോറും അടങ്ങുന്നതായിരുന്നു രോഹന്റെ ഇന്നിങ്സ്.43 പന്തില്‍ നിന്ന് 79 റണ്‍സ് അടിച്ചു കൂട്ടിയ വിഷ്ണു വിനോദും ഇന്ന് തിളങ്ങി. 3 സിക്സും 11 ഫോറും അടങ്ങുന്നത് ആയിരുന്നു വിഷ്ണുവിന്റെ ഇന്നിങ്സ്. അജ്നാസ് 15 പന്തില്‍ നിന്ന് 25 റണ്‍സും എടുത്തു. ക്യാപ്റ്റൻ സഞ്ജു സാംസണ്‍ ഇന്ന് ബാറ്റ് ചെയ്യേണ്ടി വന്നില്ല.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
ഇതുവരെ കളിച്ച 5 മത്സരങ്ങളും വിജയിച്ച കേരളം 20 പോയിന്റുമായി ഗ്രൂപ്പില്‍ ഒന്നാമത് നില്‍ക്കുകയാണ്‌.
