ദില്ലി: കെ റെയിലിനെതിരെ കേന്ദ്ര സർക്കാരിനെ നേരിട്ട് സമീപിക്കാൻ ഒരുങ്ങി സമര സമിതി. റെയില്‍വെ മന്ത്രി അശ്വനി വൈഷ്ണവിന് 25000 പേര് ഒപ്പിട്ട ഭീമ ഹർജി സമർപ്പിക്കുമെന്ന് സമര സമിതി രക്ഷധികാരി ജോസഫ് എം പുതുശ്ശേരി പറഞ്ഞു. കേരളത്തിന്‍റെ സർവ്വ നാശത്തിന് പദ്ധതി കാരണമാകും. നിയമം അനുശാസിക്കുന്ന ഒരു പഠനവും കേരളം നടത്തിയിട്ടില്ല. കെ റെയില്‍ കാരണം തൃക്കാക്കരയില്‍ അടക്കമുള്ള തെരഞ്ഞെടുപ്പുകളില്‍ ഇടതുമുന്നണി രാജയപ്പെട്ടു. ജനങ്ങള്‍ നല്‍കിയ പ്രഹരവും വിദഗ്‌ദ്ധർ നല്‍കിയ ഉപദേശവുമൊന്നും ബാധകമല്ല എന്ന രീതിയില്‍ സർക്കാർ മുന്നോട്ട് പോകുകയാണ്. പദ്ധതിയില്‍ നിന്നും സർക്കാർ പിന്നോട്ട് പോയിട്ടില്ലെന്നും സമര സമിതി ആരോപിച്ചു. കേന്ദ്ര ധനമന്ത്രി വിളിച്ചു കൂട്ടിയ യോഗത്തിലും മുഖ്യ ആവശ്യമായി കെ റെയില്‍ ഉയർത്തിയത് അതുകൊണ്ടാണെന്നും ജോസഫ് എം പുതുശ്ശേരി പറഞ്ഞു.
Advertisements
