കോട്ടയം : കോടതികളുടെ പ്രവർത്തനം ഒരു കുടക്കീഴിലാക്കുന്ന ജുഡീഷ്യൽ കോംപ്ലക്സ് കോട്ടയം ഏറെ പ്രതീക്ഷയോടെ കാത്തിരിക്കുകയാണെന്ന് എൻഡിഎ സ്ഥാനാർത്ഥിയായ തുഷാർ വെള്ളാപ്പള്ളി. കോട്ടയത്ത് അഭിഭാഷക പരിഷത്തിൻ്റെ നേതൃത്വത്തിൽ നടത്തിയ പ്രചരണ പരുപാടിയിൽ സംസാരിക്കുകയായിരുന്നു അദ്ദേഹം. നീതി തേടിയെത്തുന്നവരുടെ ഏറെ നാളത്തെ സ്വപ്നമാണിത്. ഇതിനുള്ള പരിശ്രമങ്ങൾവളരെ നേരത്തെ തന്നെ ആരംഭിച്ചതാണ്.
നീതിന്യായ സംവിധാനത്തിന് ആധുനിക മുഖം നൽകുന്നതിനും വിശാലമായ കോടതി സമുച്ചയം കൂടിയേ തീരൂ. കോടതി നടപടികൾക്കായി എത്തുന്നവർക്ക് കൂടുതൽ സൗകര്യപ്രദവും സംവിധാനത്തിന് സുരക്ഷയൊരുക്കാനും ഇതുവഴിയൊരുക്കും. പാർക്കിംഗ് ഉൾപ്പടെയുള്ള സൗകര്യങ്ങളോടെയാണ് ഇത്തരം കോംപ്ളക്സുകൾ നിർമിക്കുന്നത്. അക്ഷര നഗരത്തിൽ ഇത്തരമൊരു സമുച്ചയം യാഥാർഥ്യമാകേണ്ടത് കാലഘട്ടത്തിൻ്റെ കൂടി ആവശ്യമാണ് എന്നും തുഷാർ വെള്ളാപ്പള്ളി പറഞ്ഞു.
