തിരുവനന്തപുരം: മികച്ച പ്രകടനം കാഴ്ചവെച്ച മലയാളി താരം സഞ്ജു സാംസണ് ടെസ്റ്റ് ക്രിക്കറ്റിലും ഓപ്പണറായി അവസരം നല്‍കണമെന്ന് സഞ്ജുവിന്‍റെ ആദ്യകാല പരിശീലകനും ഡല്‍ഹി ക്യാപിറ്റല്‍സ് ഫീല്‍ഡിംഗ് പരിശീലകനുമായ ബിജു ജോര്‍ജ്. മുന്‍ ഇന്ത്യൻ താരം വീരേന്ദര്‍ സെവാഗിനെപ്പോലെ ടെസ്റ്റിലും വെടിക്കെട്ട് ബാറ്റിംഗ് കാഴ്ചവെക്കാന്‍ കഴിവുള്ള താരമാണ് സഞ്ജുവെന്നും ബിജു ജേര്‍ജ് പറഞ്ഞു.
ടെസ്റ്റ് ക്രിക്കറ്റില്‍ കളിക്കാനുളള തന്‍റെ ആഗ്രഹം സഞ്ജുവും നേരത്തെ തുറന്നു പറഞ്ഞിരുന്നു. വിരാട് കോലിയും രോഹിത് ശര്‍മയും കരിയറിന്‍റെ സായാഹ്നത്തിലാണെന്നത് ടെസ്റ്റ് ടീമില്‍ സഞ്ജുവിന് അവസരം ലഭിക്കാനുള്ള സാധ്യത കൂട്ടുന്നുമുണ്ട്. ഇതിനിടെയാണ് സഞ്ജുവിനെ ടെസ്റ്റിലും ഓപ്പണറാക്കണമെന്ന് ബിജു ജോര്‍ജ് പറയുന്നത്. ഇന്ത്യൻ ടെസ്റ്റ് ടീമിലെ ഓപ്പണര്‍ സ്ഥാനം ലക്ഷ്യമിടണമെങ്കില്‍ സഞ്ജു ആഭ്യന്തര ക്രിക്കറ്റില്‍ കേരളത്തിനായും ഓപ്പണറായി ഇറങ്ങണമെന്നും ബിജു ജോര്‍ജ് പറഞ്ഞു.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
തുടക്കം കിട്ടിയാല്‍ പിന്നെ സഞ്ജുവിനെ തടയുക അസാധ്യമായിരിക്കും. സഞ്ജു വീരേന്ദര്‍ സെവാഗിനെപ്പോലെയാണെന്നും അങ്ങനെയുള്ള കളിക്കാര്‍ എല്ലാ മത്സരങ്ങളിലും വലിയ സ്കോര്‍ നേടിയില്ലെങ്കിലും മാച്ച്‌ വിന്നര്‍മാരാകുമെന്നും ബിജു ജോര്‍ജ് പറഞ്ഞു.
