കൊച്ചി :സിനിമ, പരസ്യ സംവിധായകൻ കെ എൻ ശശിധരൻ അന്തരിച്ചു. ഇടപ്പള്ളിയിലെ വീട്ടിൽ തിങ്കളാഴ്ച്ച പുലർച്ചെയായിരുന്നു അന്ത്യം.പതിവ് സമയം കഴിഞ്ഞിട്ടും ഉറക്കമെഴുനേൽക്കാതെ വന്നതോടെ വീട്ടുകാർ നോക്കിയപ്പോൾ മരിച്ച നിലയിൽകണ്ടെത്തുകയായിരുന്നു. പൂനെ ഫിലിം ഇൻസ്റ്റിറ്റ്യൂട്ടിൽ നിന്നും ബിരുദം കരസ്ഥമാക്കിയ കെ എൻ ശശിധരൻ ആദ്യം സംവിധാനം ചെയ്തത് അക്കരെ എന്ന ചിത്രമാണ്. പി കെ നന്ദനവർമ്മയുടെ അക്കരെ എന്ന നോവലിനെ അടിസ്ഥാനമാക്കിയാണ് ചിത്രത്തിന്റെ തിരക്കഥയും സംഭാഷണവും ഒരുക്കി സംവിധാനം ചെയ്തത്. ചിത്രത്തിന്റെ നിർമ്മാണവും ശശിധരൻ ആയിരുന്നു. കാണാതായ പെൺകുട്ടി, നയന തുടങ്ങിയവയാണ് മറ്റു ചിത്രങ്ങൾ. മലയാളികൾക്ക് ഏറെ സുപരിചിതമായിരുന്ന ‘വന്നല്ലോ വന്നല്ലോ വനമാല വന്നല്ലോ’ എന്ന വനമാല സോപ്പിന്റെ പരസ്യവും കെ എൻ ശശിധരൻ സംവിധാനം ചെയ്തതാണ്. സിദ്ദിഖും കാവ്യാ മാധവനുമാണ് പരസ്യചിത്രത്തിൽ അഭിനയിച്ചത്.
