യുവ സിനിമാ പ്രേമികള്‍ ആകാംക്ഷയോടെ കാത്തിരിക്കുന്ന ചിത്രമാണ് വിനീത് ശ്രീനിവാസൻ സംവിധാനം ചെയ്യുന്ന ‘വര്‍ഷങ്ങള്‍ക്ക് ശേഷം’. മലയാള സിനിമാ മേഖലയില്‍ വലിയ ഹിറ്റ് സമ്മാനിച്ച ഹൃദയം ടീം ഒന്നിക്കുന്നു എന്ന പ്രത്യേകതയും ഈ സിനിമക്കുണ്ട്. മലയാളത്തിന്റെ യുവത്വത്തിന് ആവേശമാകുന്ന താരങ്ങളെ പ്രധാന കഥാപാത്രങ്ങളാക്കിയാണ് ചിത്രം ഒരുങ്ങുന്നത്. ആരാധകരുടെ കാത്തിരിപ്പിനിടെ വിനീത് ശ്രീനിവാസൻ ഇൻസ്റ്റഗ്രാമില്‍ പങ്കുവച്ച ചിത്രമാണ് ഇപ്പോള്‍ ശ്രദ്ധേയമാകുന്നത്.
ധ്യാൻ ശ്രീനിവാസൻ, പ്രണവ് മോഹൻലാല്‍, നിവിൻ പോളി എന്നിവര്‍ക്കൊപ്പമുള്ള ചിത്രമാണ് വിനീത് ശ്രീനിവാസൻ പങ്കുവച്ചിരിക്കുന്നത്. ചിത്രം പങ്കുവച്ചതിന് പിന്നാലെ നിരവധി പേരാണ് അഭിപ്രായങ്ങള്‍ പങ്കുവച്ചും ആശംസകള്‍ അറിയിച്ചും രംഗത്തെത്തിയത്. കല്യാണി പ്രിയദര്‍ശന്‍, അജു വര്‍ഗീസ്, ബേസില്‍ ജോസഫ്, നീരജ് മാധവ് എന്നിവരുള്‍പ്പെടെ വൻ താരനിരയാണ് ചിത്രത്തിലുള്ളത്. ഇവര്‍ക്കൊപ്പം വിനീത് ശ്രീനിവാസനും പ്രധാന വേഷം ചെയ്യുന്നുണ്ട്.
മലയാളികള്‍ക്ക് വിഷു കൈനീട്ടമായി ഏപ്രിലിലാണ് ചിത്രം തിയേറ്ററുകളിലെത്തുക. ഡിസംബര്‍ 20-നാണ് സിനിമയിടെ ചിത്രീകരണം പൂര്‍ത്തിയായത്. നിലവില്‍ ചിത്രത്തിന്റെ ഡബ്ബിംഗ് നടന്നുകൊണ്ടിരിക്കുകയാണ്. വൈശാഖ് സുബ്രഹ്‍മണ്യം മേരിലാന്റ് സിനിമാസിന്റെ ബാനറിലാണ് ചിത്രം നിര്‍മ്മിക്കുന്നത്.
