സ്പോർട്സ് ഡെസ്ക്ക് : രാജ്‌കോട്ടിലെ നിരഞ്‌ജന്‍ ഷാ സ്‌റ്റേഡിയത്തില്‍ ഇംഗ്ലണ്ടിനെ തകര്‍ത്ത ഇന്ത്യ ലോക ടെസ്റ്റ് ക്രിക്കറ്റ്‌ ചാമ്പ്യന്‍ഷിപ്പ്‌ പട്ടികയില്‍ രണ്ടാം സ്‌ഥാനത്ത്‌ തുടര്‍ന്നു. ഇന്ത്യയുടെ പോയിന്റ്‌ ശതമാനം 59.52 ആയി. 75 പോയിന്റ്‌ ശതമാനവുമായി ന്യൂസിലന്‍ഡ്‌ ആണ്‌ മുന്നില്‍.
നിലവിലെ ചാമ്പ്യന്‍മാരായ ഓസ്‌ട്രേലിയ 10 മത്സരങ്ങള്‍ക്ക്‌ ശേഷം 55 പോയിന്റ്‌ വിജയ ശതമാനവുമായി മൂന്നാം സ്‌ഥാനത്താണ്‌. ലോക ടെസ്റ്റ് ചാമ്പ്യന്‍ഷിപ്പ്‌ ടൂര്‍ണമെന്റില്‍ ഏഴ്‌ മത്സരങ്ങള്‍ കളിച്ച ഇന്ത്യന്‍ ടീം നാലെണ്ണം ജയിക്കുകയും രണ്ടെണ്ണം തോല്‍ക്കുകയും ഒന്നില്‍ സമനിലയിലാകുകയും ചെയ്‌തു. വെസ്‌റ്റിന്‍ഡീസിലും ദക്ഷിണാഫ്രിക്കയിലും ഓരോ ടെസ്റ്റ് മത്സരങ്ങളും ഇംഗ്ലണ്ടിനെതിരെ രണ്ട്‌ ടെസ്‌റ്റും ഇന്ത്യ ജയിച്ചു. ഇന്ത്യ ദക്ഷിണാഫ്രിക്കയ്‌ക്കും ഇംഗ്ലണ്ടിനുമെതിരെ തോറ്റു. വെസ്‌റ്റിന്‍ന്‍ഡീസിനെതിരെയാണ്‌ സമനില വഴങ്ങിയത്‌. ചാമ്പ്യന്‍ഷിപ്പില്‍ ഇംഗ്ലണ്ട്‌ എട്ടാം സ്‌ഥാനത്താണ്‌.
