കൊല്ലം: ലിങ്ക് റോഡിന്റെ നാലാം റീച്ച്‌ പണി ആരംഭിക്കാൻ യാതൊരുവിധ നടപടിയും സ്വീകരിച്ചില്ലെന്ന് ആരോപിച്ച്‌ എംഎല്‍എ മുകേഷിനെതിരെ പ്രതിഷേധവുമായി യൂത്ത് കോണ്‍ഗ്രസ് പ്രവർത്തകർ. കൊല്ലത്തെ പാര്‍ട്ട് ടൈം എം.എല്‍.എ. യ്ക്ക് വെളിവുണ്ടാകട്ടെയെന്നും 103 കോടി രൂപ ചെലവഴിച്ചിട്ടും ആര്‍ക്കും പ്രയോജനമില്ലാതെ ഇട്ടിരിക്കുന്ന മൂന്നാം റീച്ച്‌ തുറന്നു നല്‍കണമെന്നും ആവശ്യപ്പെട്ട് പ്രതീകാത്മകമായി തേങ്ങയുടച്ചാണ് യൂത്ത് കോണ്‍ഗ്രസ് പ്രതിഷേധിച്ചത്. കെഎസ്‌ആര്‍ടിസിക്ക് മുന്നില്‍ കൊല്ലം ലിങ്ക് റോഡിന്റെ ആരംഭ സ്ഥലത്താണ് പ്രതിഷേധം സംഘടിപ്പിച്ചത്.
തന്റെ കീശയില്‍ നിന്നും പണം മുടക്കി നിര്‍മ്മിച്ചതുപോലെയാണ് താൻ തീരുമാനിക്കുമ്പോള്‍ മാത്രം തുറന്നാല്‍ മതിയെന്നാണ് എംഎല്‍എയുടെ ധാര്‍ഷ്ട്യം. ഇത് ജനങ്ങളോടുള്ള വെല്ലുവിളിയാണെന്ന് പ്രതിഷേധം ഉദ്ഘാടനം ചെയ്തുകൊണ്ട് യൂത്ത് കോണ്‍ഗ്രസ് സംസ്ഥാന വൈസ് പ്രസിഡന്റ് വിഷ്ണു സുനില്‍ പന്തളം ആരോപിച്ചു. കൊല്ലം ബ്ലോക്ക് പ്രസിഡന്റ് ഹസ്ന ഹര്‍ഷാദ്, സംസ്ഥാന ഭാരവാഹികളായ ശരത് മോഹൻ, അസൈൻ പള്ളിമുക്ക്, കെഎസ്‍യു സംസ്ഥാന ജനറല്‍ സെക്രട്ടറി ആഷിക് ബൈജു, നിഷാദ് അസീസ്‌, ഷെമീര്‍ ചാത്തിനാംകുളം, ഹര്‍ഷാദ് മുതിരപറമ്പ്, നസ്മല്‍ കലതിക്കാട്, രമേശ് കടപ്പാക്കട, അഭിഷേക് ഗോപൻ, ഷിബു കടവൂര്‍, അഫ്‌സല്‍ റഹിം തുടങ്ങിയവര്‍ പ്രതിഷേധ പരിപാടിയില്‍ സംസാരിച്ചു.
