ഗുരുവായൂർ ആനയോട്ടം: കൊമ്പൻ ഗോകുൽ ജേതാവ്; ഗുരുവായൂരപ്പന്റെ സ്വർണ്ണ തിടമ്പേറ്റും

തൃശൂർ: ഗുരുവായൂർ ക്ഷേത്രോത്സവത്തിന് തുടക്കം കുറിച്ച് നടന്ന പ്രസിദ്ധമായ ആനയോട്ടത്തിൽ കൊമ്പൻ ഗോകുൽ ജേതാവ്. കൊവിഡിന് ശേഷം 5 ആനകൾ പങ്കെടുത്ത ആനയോട്ടമാണ് ഇക്കുറി നടന്നത്.

രാത്രി ക്ഷേത്രം തന്ത്രി കൊടിയേറ്റുന്നതോടെ 10 ദിവസം നീണ്ട് നിൽക്കുന്ന ഉത്സവത്തിന് തുടക്കമാകും.

ദേവസ്വത്തിന് കീഴിലുള്ള 19 ആനകൾ ഉച്ചയോടെ മഞ്ജുളാൽ പരിസരത്ത് അണിനിരന്നു. ഇവരിൽ കൊമ്പന്മാരായ ഗോകുൽ , ചെന്താമരാക്ഷൻ, കണ്ണൻ, രവികൃഷ്ണൻ, പിടിയാനയായ ദേവി എന്നിവരാണ് മത്സരത്തിൽ പങ്കെടുത്തത്.
നാഴിക മണി മൂന്ന് അടിച്ചതോടെ പാരമ്പര്യ അവകാശികളിൽ നിന്നും ഏറ്റുവാങ്ങിയ കുടമണികളുമായി പാപ്പാന്മാർ മഞ്ചുളാൽ പരിസരത്തേക്ക് ഓടി.

കുടമണികൾ ആനകൾക്ക് അണിയിച്ചതിന് പിന്നാലെ ശംഖൊലി. 5 ആനകളും മത്സരിച്ച് ഓടി. കാണികളുടെ ആർപ്പുവിളികൾക്കൊപ്പം കൊമ്പൻ ഗോകുൽ ഒന്നാമതായി ഓടിയെത്തി ക്ഷേത്രത്തിനകത്ത് പ്രവേശിച്ചു. പിന്നാലെ ചെന്താമരാക്ഷനും എത്തി.

ഇനിയുള്ള 10 ദിവസം ജേതാവായ ഗോകുൽ ഗുരുവായൂരപ്പന്റെ സ്വർണ്ണ തിടമ്പേറ്റും