ന്യൂസ് ഡെസ്ക് : ആദ്യമായി അഭിനയിച്ച ചിത്രത്തില്‍ തന്നെ മികച്ച ബാലതാരത്തിനുള്ള പുരസ്‌കാരം നേടിയ സന്തോഷത്തിലാണ് തന്മയ സോള്‍. മാളികപ്പുറം സിനിമയില്‍ കല്ലു എന്ന കഥാപാത്രത്തെ അവതരിപ്പിച്ച ദേവനന്ദയും മത്സരത്തില്‍ തന്മയ്‌ക്കൊപ്പം അവസാന റൗണ്ട് വരെ എത്തിയിരുന്നു.പിന്നാലെ വിവാദങ്ങളും ഉയര്‍ന്നിരുന്നു. ഇപ്പോഴിതാ സംസ്ഥാന ചലച്ചിത്ര പുരസ്‌കാരത്തിലെ മികച്ച ബാലതാരത്തിനുള്ള അവാര്‍ഡുമായി ബന്ധപ്പെട്ടുള്ള വിവാദത്തെ പറ്റിയുള്ള ചോദ്യത്തിന് ബാലനടി തന്മയ സോള്‍ നല്‍കിയ മറുപടിയാണ് ശ്രദ്ധ നേടുന്നത്.
സുന്ദരിയായ ദേവനന്ദക്ക് അവാര്‍ഡ് ലഭിക്കും എന്നാണ് എല്ലാവരും പ്രതീക്ഷിച്ചതെന്ന അവതാരകന്റെ പരിഹാസത്തിന് ‘വെളുത്താലേ സൗന്ദര്യമാവുകയുള്ളോ’ എന്നുള്ള തന്മയയുടെ ചോദ്യമാണ് വൈറലാകുന്നത്. 2021 സംസ്ഥാന ചലച്ചിത്ര പുരസ്‌കാരത്തില്‍ വഴക്ക് എന്ന ചിത്രത്തിലെ പ്രകടനത്തിന് തന്മയയെയാണ് മികച്ച ബാലതാരമായി തെരഞ്ഞെടുത്തത്.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
പിന്നാലെ മാളികപ്പുറം എന്ന ചിത്രത്തില്‍ അഭിനയിച്ച ദേവനന്ദക്ക് അവാര്‍ഡ് നല്‍കണം എന്ന് ഒരു കോണില്‍ നിന്നും വാദങ്ങളുയര്‍ന്നിരുന്നു. ഇത് സംബന്ധിച്ചായിരുന്നു ഒരു യുട്യൂബ് ചാനലിലെ അവതാരകന്റെ ചോദ്യം.
‘സംസ്ഥാന അവാര്‍ഡ് പ്രഖ്യാപനത്തില്‍ എല്ലാവരും ഉറ്റുനോക്കിയിരുന്നത് ദേവനന്ദയെയാണ്. ഭയങ്കര സുന്ദരിയായ, ഗ്ലാമറസായ കുട്ടിയെ ആണ് ബാലതാരമായി എല്ലാവരും നോക്കിയിരുന്നത്. ആ പ്രതീക്ഷകള്‍ക്ക് വിപരീതമായാണ് തന്മയയെ കാണുന്നത്. അതിന്റെ പേരില്‍ ഒരുപാട് ചര്‍ച്ചകള്‍ ഉണ്ടായി. ഇയാള്‍ക്കാണോ അവാര്‍ഡ് കിട്ടിയത്, ഇയാളെങ്ങനെ സിനിമയില്‍ വരുമെന്നൊക്കെ ചോദിച്ചു. അതിനെ പറ്റി എന്താണ് അഭിപ്രായം’ എന്നായിരുന്നു അവതാരകന്റെ ചോദ്യം.
തനിക്ക് സന്തോമേയുള്ളൂവെന്നായിരുന്നു തന്മയയുടെ ആദ്യപ്രതികരണം. കളിയാക്കലുകള്‍ എല്ലാവര്‍ക്കും കിട്ടില്ല. വലിയ ഉയരത്തില്‍ നില്‍ക്കുന്നവര്‍ക്കേ അതൊക്കെ കിട്ടുകയുള്ളൂ. അത്രക്കും ഉയരത്തില്‍ എത്തി എന്ന് വേണമെങ്കില്‍ എനിക്ക് കരുതാം. അത് ആലോചിച്ച്‌ വിഷമിച്ചാല്‍ ഞാന്‍ എന്റെ സമയം വേസ്റ്റ് ചെയ്യുകയാണ്. പിന്നെ വെളുപ്പിലാണ് സൗന്ദര്യമെന്ന് ഞാന്‍ കരുതുന്നില്ല.
ദേവനന്ദ വളരെ സുന്ദരിയാണെന്ന് ചേട്ടന്‍ പറഞ്ഞു. ശരിയാണ് ദേവനന്ദയും സുന്ദരിയാണ്. ഞാന്‍ നല്ലതല്ല എന്ന് ചേട്ടന്‍ പറയുന്നു, വെളുത്താല്‍ മാത്രമാണ് നല്ലതെന്ന് പറയുന്നു. ആളുകള്‍ക്ക് പല അഭിപ്രായമുണ്ട്. അവര്‍ക്ക് അത് പറയാം. അവരത് പറയട്ടെ. എന്നെ അത് ബാധിക്കില്ല. കേള്‍ക്കാനും രസമുണ്ട് മലയാളത്തിലും തമിഴിലുമെല്ലാം അഭിനയിക്കുക എന്നതാണ് എന്റെ ആഗ്രഹം’ എന്നും തന്മയ പറഞ്ഞു.
ഹോളിവുഡ് താരമായ തിമോത്തി ഷാലമേയ്‌ക്കൊപ്പം അഭിനയിക്കാനുള്ള ആഗ്രഹവും ദേവനന്ദ പങ്കുവച്ചു. വീഡിയോ പുറത്ത് വന്നതോടെ തന്മയയുടെ മറുപടിക്ക് കയ്യടിയും അവതാരകന്റെ ചോദ്യത്തിന് വിമര്‍ശനവും ഉയരുകയാണ്. ആ കൊച്ചുകുട്ടിയുടെ വിവരം പോലും അവതാരകനില്ലെന്നും വിവരക്കേടിന് നല്ല മറുപടി കിട്ടിയെന്നുമാണ് വീഡിയോയുടെ കമന്റില്‍ തന്നെ വരുന്ന മറുപടി.
