തുഴയെറിഞ്ഞ് ലക്ഷ്യം തേടി ഒമ്പതു ചുണ്ടനുകൾ ;  താഴത്തങ്ങാടി ചാമ്പ്യൻസ് ബോട്ട് ലീഗിൽ മാറ്റുരയ്ക്കുന്ന വള്ളങ്ങൾ ഇവ 

കോട്ടയം : താഴത്തങ്ങാടി ചാമ്പ്യൻസ് ബോട്ട് ലീഗിൽ മത്സരിക്കുക ഒമ്പതു ചുണ്ടൻ വള്ളങ്ങൾ. . നടുഭാഗം (ബോട്ട് ക്ലബ്: യു.ബി.സി. കൈനകരി), സെന്റ് പയസ് ടെൻത് (നിരണം ബോട്ട് ക്ലബ്), വീയപുരം (പള്ളാത്തുരുത്തി ബോട്ട് ക്ലബ്), മഹാദേവികാട്ടിൽ തെക്കേതിൽ(പൊലീസ് ബോട്ട് ക്ലബ്), നിരണം (കുമരകം എൻ.സി.ഡി.സി. ബോട്ട് ക്ലബ്), ചമ്പക്കുളം(കുമരകം ടൗൺ ബോട്ട് ക്ലബ്), പായിപ്പാടൻ (കുമരകം ബോട്ട് ക്ലബ് ആൻഡ് എസ്.എഫ്.ബി.സി.), കാരിച്ചാൽ (പുന്നമട ബോട്ട് ക്ലബ്), ആയാപറമ്പ് പാണ്ടി (വേമ്പനാട് ബോട്ട് ക്ലബ്) എന്നീ ചുണ്ടനുകൾ മാറ്റുരയ്ക്കും.

ഉച്ചകഴിഞ്ഞ് മൂന്നു മുതലാണ് മത്സരങ്ങൾ. ഒന്നാംസ്ഥാനത്തെത്തുന്നവർക്ക് അഞ്ചു ലക്ഷവും രണ്ടും മൂന്നും സ്ഥാനത്തെത്തുന്നവർക്ക് യഥാക്രമം മൂന്ന്, ഒരു ലക്ഷം രൂപയുമാണ് സമ്മാനം ലഭിക്കുക. മത്സരത്തിൽ പങ്കെടുക്കുന്ന ചുണ്ടൻ വള്ളങ്ങൾക്ക് നാലു ലക്ഷം രൂപ വീതം ബോണസ് ലഭിക്കും. സി.ബി.എല്ലിനൊപ്പം താഴത്തങ്ങാടി വള്ളംകളിയുടെ ഭാഗമായി കോട്ടയം വെസ്റ്റ് ക്ലബിൽ രജിസ്റ്റർ ചെയ്ത 19 ചെറുവള്ളങ്ങളുടെ മത്സരവും നടക്കും. ആദ്യ മൂന്ന് ഹീറ്റ്സ് മത്സരങ്ങൾക്കു ശേഷമാണ് ചെറുവള്ളങ്ങളുടെ ഹീറ്റ്സ് മത്സരം. ഇരുട്ടുകുത്തി എ, ബി ഗ്രേഡ്, വെപ്പ് എ, ബി ഗ്രേഡ്, ചുരുളൻ വള്ളങ്ങളാണ് മത്സരിക്കുക. 

ഇടവേളയ്ക്കുശേഷം ചെറുവള്ളങ്ങളുടെ ലൂസേഴ്സ്, ഫൈനൽ മത്സരങ്ങൾ നടക്കും. തുടർന്നാണ് സി.ബി.എൽ. ഫൈനൽ മത്സരം നടക്കുക.സ്റ്റാർട്ടിങ് പോയിന്റിലുള്ള തൂക്കുപാലത്തിൽ ആളുകൾ കൂട്ടംകൂടി നിൽക്കാൻ അനുവദിക്കില്ല. മത്സരസമയത്ത് ഫിനിഷിങ് പോയിന്റിലെ പാലത്തിനടിയിലോ ഫോട്ടോ ഫിനിഷിംഗ് സംവിധാനത്തിനായി സ്ഥാപിച്ച കാലുകളിലോ ആളുകൾ കയറുന്നത് തടയാൻ പൊലീസ് കർശന നടപടി സ്വീകരിക്കും.