ചണ്ഡിഗഡ്: ഹോട്ടല്‍ മുറിയില്‍ ഒളിച്ചുകടന്ന് അതിഥിയുടെ കുളിമുറിയിലെ ദൃശ്യങ്ങള്‍ മൊബൈലില്‍ പകർത്തിയ സംഭവത്തില്‍ ഹോട്ടല്‍ ജീവനക്കാരൻ പിടിയില്‍. ചണ്ഡിഗഡിലെ സെക്‌ടർ17ലെ താജ് ഹോട്ടലിലാണ് സംഭവം.ഇക്കഴിഞ്ഞ ശനിയാഴ്‌ചയാണ് ഹോട്ടല്‍ ജീവനക്കാരൻ ജമ്മു സ്വദേശിയായ വനിത തങ്ങുന്ന മുറിയുടെ മാസ്റ്റർ കീ സ്വന്തമാക്കിയ ശേഷം കുളിമുറിയിലായിരുന്ന വനിതയുടെ ദൃശ്യങ്ങള്‍ വീഡിയോയില്‍ പകർത്തിയത്. ഇയാളെ കണ്ട് വനിത ബഹളം വച്ചതോടെ പ്രതി ഓടി രക്ഷപ്പെട്ടു. പിന്നാലെ മൊബൈലില്‍ പകർത്തിയ വീഡിയോ ദൃശ്യങ്ങളും ഡിലീറ്റ് ചെയ്‌തു. സ്ത്രീ ഇയാള്‍ക്കെതിരെ ഹോട്ടല്‍ അധികൃതർക്ക് പരാതി നല്‍കി. തുടർന്ന് പൊലീസ് സ്ഥലത്തെത്തി ഹോട്ടലിലെ സിസിടിവി ദൃശ്യങ്ങളില്‍ നിന്ന് പ്രതി ഹോട്ടല്‍ മുറിയിലേക്ക് പോയതായി സ്ഥിരീകരിച്ചു. പിന്നാലെ ഇയാളെ അറസ്റ്റ് ചെയ്‌തു. സംഭവം നിർഭാഗ്യകരമായിപ്പോയെന്നും ജീവനക്കാരനെതിരെ അച്ചടക്ക നടപടി സ്വീകരിച്ചതായും പൊലീസ് അന്വേഷണത്തോട് പൂർണമായും സഹകരിക്കുമെന്നും ഹോട്ടല്‍ അധികൃതർ അറിയിച്ചു.
ഹോട്ടല്‍ മുറിയില്‍ ഒളിച്ചുകടന്ന് അതിഥിയുടെ കുളിമുറി ദൃശ്യങ്ങൾ പകർത്തി : ഹോട്ടല്‍ ജീവനക്കാരൻ പിടിയില്‍
