കോട്ടയം: പാറപ്പാടത്തെ അധ്യാപകൻ വീണ്ടും പോക്‌സോ കേസിൽ അറസ്റ്റിൽ. കോട്ടയം നഗരത്തിലെ സ്കൂൾ അധ്യാപകൻ പാറപ്പാടം കൊട്ടാരത്തിൽപ്പറമ്പിൽ കെ.എം മനോജിനെയാണ് കോട്ടയം വെസ്റ്റ് സ്റ്റേഷൻ ഹൗസ് ഓഫിസർ ഇൻസ്പെക്ടർ കെ. ശ്രീകുമാർ അറസ്റ്റ് ചെയ്തത്. ഇയാളെ കോടതിയിൽ ഹാജരാക്കി റിമാൻഡ് ചെയ്തു. കഴിഞ്ഞ ദിവസമാണ് ഇയാൾക്കെതിരെ സ്കൂൾ വിദ്യാർത്ഥി പരാതി നൽകിയത്. ഈ പരാതിയുടെ അടിസ്ഥാനത്തിൽ പൊലീസ് എഫ്‌ഐആർ രജിസ്റ്റർ ചെയ്തത്. തുടർന്ന്, പൊലീസ് അന്വേഷണം ആരംഭിച്ചതോടെ അധ്യാപകൻ ഒളിവിൽ പോകുകയായിരുന്നു. ഇതിന് പിന്നാലെയാണ് കോട്ടയം വെസ്റ്റ് പൊലീസ് അന്വേഷണം ആരംഭിച്ചത്. മുണ്ടക്കയം ഭാഗത്ത് ഇയാൾ ഒളിവിലുണ്ടെന്ന് അറിഞ്ഞ് കഴിഞ്ഞ ദിവസം രാത്രിയിൽ പൊലീസ് മുണ്ടക്കയത്തെ ലോഡ്ജിൽ നിന്നും പ്രതിയായ അധ്യാപകനെ അറസ്റ്റ് ചെയ്യുകയായിരുന്നു. കോടതിയിൽ ഹാജരാക്കിയ അധ്യാപകനെ റിമാൻഡ് ചെയ്തു. ഇയാൾക്കെതിരെ നേരത്തെയും സമാന രീതിയിലുള്ള പരാതികൾ ഉയർന്നിട്ടുണ്ടെന്നു പൊലീസ് പറഞ്ഞു.
