കോട്ടയം: കാക്കിക്കുള്ളിലെ സഹായഹസ്തത്തിന് ഒരിക്കൽകൂടി സാക്ഷിയായി കോട്ടയം നഗരം. വെള്ളിയാഴ്ച രാത്രി 12 മണിയോടെ ബേക്കർ ജങ്ഷനിൽ ബൈക്ക് യാത്രികന് കൺട്രോൾറൂമിലെ ഉദ്യോഗസ്ഥർ സഹായവുമായി എത്തിയത്. ബൈക്കിന്‍റെ ബ്രേക്കിന് തകരാർ സംഭവിച്ചതിനെ തുടർന്ന് വഴിയിൽ സഹായം കാത്തുനിന്ന യുവാവിന്‍റെ അരികിലേക്ക് യാദൃശ്ഛികമായാണ് നൈറ്റ് പെട്രോളിങിന് ഇറങ്ങിയ വെഹിക്കിൾ-ഒന്നിലെ ഉദ്യോഗസ്ഥരായ എസ്.ഐ അഫ്സൽ, ഗ്രേഡ് എ.എസ്.ഐ അഷിത് കൃഷ്ണ എന്നീ പൊലീസുദ്യോഗസ്ഥർ എത്തിയത്.തുടർന്ന് യുവാവിൽ നിന്നും വിവരങ്ങൾ ചോദിച്ചറിയുകയും ഗ്രേഡ് എ.എസ്.ഐ അഷിത് കൃഷ്ണ തന്‍റെ മെക്കാനിക്ക് രംഗത്തെ വൈദഗ്ദ്യത്തിലൂടെ ബൈക്കിന്‍റെ പ്രശ്നം പരിഹരിച്ച ശേഷം യുവാവിന്‍റെ യാത്ര തുടരുകയുമായിരുന്നു.
ബേക്കർ ജങ്ഷനിൽ തന്നെ ഡബിൾ ഗിയർ വീണതിനെ തുടർന്ന് മിനിലോറി ഇറക്കത്തിൽ നിന്നുപോവുകയും അന്ന് ഡ്യൂട്ടിയിലുണ്ടായിരുന്ന അഷിത് കൃഷ്ണ വാഹനത്തിനടിയിലേക്ക് വലിഞ്ഞുകയറി ഗിയർ റിലീസ് ആക്കി വാഹനത്തിന്‍റെ തകരാർ മാറ്റിയ സംഭവവും അദ്ദേഹം ഓർക്കുന്നു. കുമാരനല്ലൂർ സ്വദേശിയായ അഷിത് കൃഷ്ണ 20 വർഷമായി സേനയുടെ ഭാഗമാണ്. തൃശൂർ, കോട്ടയം ക്യാമ്പുകളിലായിരുന്നു കൂടുതൽ കാലവും. അഞ്ച് മാസം മുമ്പാണ് കൺട്രോൾറൂമിലേക്ക് എത്തിയത്. ചെറുപ്പംമുതലേ വാഹനങ്ങളിൽ ഏറെ കമ്പമുണ്ട് അഷിത് കൃഷ്ണക്ക്. ക്യാമ്പിലെ ഒരുവിധം വാഹനങ്ങൾ ഇദ്ദേഹം പെരുമാറിയിട്ടുണ്ട്. ചുരുക്കം പൊലീസുകാരുടെ പെരുമാറ്റത്തിൽ പഴി കേൾക്കേണ്ടിവരുന്ന സേനയിലെ സേവനമനോഭാവമുള്ള ഉദ്യോഗസ്ഥർക്കും പ്രചോദനമാവുകയാണ് എ.എസ്.ഐ അഷിത് കൃഷ്ണയുടെ കർമ്മനിരത.