കോട്ടയം: ജില്ലാ പൊലീസ് സഹകരണ സംഘം തിരഞ്ഞെടുപ്പിൽ രണ്ട് പാനൽ തിരിഞ്ഞ് മത്സരം. ഇടത് അനൂകൂല സംഘടനയും വലത് പക്ഷ അനുകൂല സംഘടനയുമാണ് രണ്ട് വിഭാഗങ്ങളായി തിരിഞ്ഞ് മത്സര രംഗത്തുള്ളത്. ഭരണപക്ഷത്തെ പിൻതുണയ്ക്കുന്ന ഇടത് അനുകൂല സംഘടനയിൽ നിന്നും മൂന്ന് വനിതാ പ്രതിനിധികൾ ഇതിനോടകം എതിരില്ലാതെ തിരഞ്ഞെടുക്കപ്പെട്ട് കഴിഞ്ഞു. ബാക്കിയുള്ള എട്ട് സീറ്റുകളിലേയ്ക്കാണ് ഇപ്പോൾ മത്സരം നടക്കുന്നത്. ജൂലായ് 25 ന് രാവിലെ എട്ടു മുതൽ വൈകിട്ട് നാലു വരെ പൊലീസ് സൊസൈറ്റി സെല്ലാറിലാണ് തിരഞ്ഞെടുപ്പ് നടക്കുക.
ഭരണാനുകൂല വിഭാഗത്തിൽ നിന്നും അജിത് ടി.ചിറയിൽ, ബിജു ചെറിയാൻ, അനസ് കെ.ടി, രഞ്ജിത്ത് കുമാർ പി.ആർ , ബിനു കെ.ഭാസ്‌കർ, എ.അനൂപ്, അരുൺ കുമാർ എസ്, എൻ.എസ് സജീവ് എന്നിവരാണ് മത്സരിക്കുന്നത്. ഈ പാനലിൽ നിന്നും വനിതാ വിഭാഗത്തിൽ റോഷനാ അലവി, സി.എസ് റെജിമോൾ, എസ്.പി ശരണ്യ എന്നിവർ എതിരില്ലാതെ തിരഞ്ഞെടുക്കപ്പെട്ടു. ഇവർ എല്ലാവരും നിലവിലുള്ള ഭരണസമിതിയുടെ പാനലിൽ മത്സരിക്കുന്നവരാണ്. നിലവിലുള്ള ഭരണ സമിതിയ്ക്ക് എതിരായി വലതുപക്ഷ പാനലിൽ എട്ടു പേരാണ് മത്സര രംഗത്തുള്ളത്. അജി.ആർ, നിയാസ് ടി.എച്ച്, സി.സൂരജ്, റെജി ജോൺ പി, റോബി തോമസ്, സന്തോഷ് കെ.കെ , അതിജ് എം ചെല്ലപ്പൻ, അജിത്കുമാർ എന്നിവരാണ് ഈ പാനലിൽ മത്സരിക്കുന്നത്.
