കോട്ടയം : കോട്ടയം നഗര മധ്യത്തിൽ നിയന്ത്രണം നഷ്ടമായ പിക്കപ്പ് വാഹനം ഓട്ടോറിക്ഷയിലും കാറിലും ഇടിച്ച് മറിഞ്ഞു. വാഹനം ഇടിച്ചു നിന്നത് കെഎസ്ഇബിയുടെ ട്രാൻസ്ഫോർമറിൽ. ഒഴിവായത് വൻ ദുരന്തം. ഇതിനെ തുടർന്ന് ടിബി റോഡിൽ വൻ ഗതാഗതക്കുരുക്കാണ് അനുഭവപ്പെടുന്നത്. ഇന്ന് രാവിലെ പത്തരയോടെ കൂടിയാണ് സംഭവം ഉണ്ടായത്.
കെഎസ്ഇബിയുടെ ട്രാൻസ്ഫോർമറിലേക്ക് വണ്ടി ഇടിച്ചു കയറിയതോടെ കോട്ടയം നഗരമധ്യത്തിൽ വൈദ്യുതിയും പൂർണമായി നഷ്ടപ്പെട്ടു. ഏകദേശം നാല് ലക്ഷം രൂപയുടെ നഷ്ടം സംഭവിച്ചതായി കെഎസ്ഇബി അധികൃതർ അറിയിച്ചു. കോട്ടയം കെഎസ്ആർടിസി സ്റ്റാൻഡ് റോഡ് ഇറങ്ങി വരികയായിരുന്ന പിക്കപ്പ് വാഹനമാണ് അപകടത്തിൽപ്പെട്ടത്. നിയന്ത്രണം നഷ്ടമായ പിക്കപ്പ് വാഹനം മുന്നിലൂടെ പോയ ഓട്ടോറിക്ഷയിലും കാറിലും ഇടിച്ച് കെഎസ്ഇബിയുടെ ട്രാൻസ്ഫോമറിലേക്ക് ഇടിച്ച് കയറുകയായിരുന്നു.അപകടത്തെ തുടർന്ന് ടിബി റോഡിൽ വൻ ഗതാഗതക്കുരുക്കുണ്ടായി. എംസാന്റ്റുമായി വന്ന വാഹനമാണ് അപകടത്തിൽപ്പെട്ടത്. അപകടത്തിൽ രണ്ടുപേർക്ക് പരിക്കേറ്റു. ഇവരെ കോട്ടയം ജില്ലാ ജനറൽ ആശുപത്രിയിലേക്ക് മാറ്റി.
