കോട്ടയം : കേരള സർക്കാർ വനിതാ ശിശു വികസന വകുപ്പ് ജില്ലാ ശിശു സംരക്ഷണ യുണിറ്റിന്റെ നേതൃത്വത്തിൽ ശിശു ദിന വാരാഘോഷത്തിന്റെ ഭാഗമായി ജില്ലയിലെ തെരഞ്ഞെടുത്ത സ്കൂളിലെ കുട്ടികളും ജില്ലയിലെ വിവിധ വകുപ്പ് മേധാവികളുമായി മുഖാമുഖം പരിപാടി സംഘടിപ്പിച്ചു. കോട്ടയം എം ഡി സെമിനാരി ഹയർ സെക്കണ്ടറി സ്കൂൾ ഹാളിൽ വച്ചു നടത്തിയ പരിപാടി അഡിഷണൽ ജില്ലാ മജിസ്‌ട്രേറ്റ് ബീന പി ആനന്ദ് ഉത്ഘാടനം നിർവ്വഹിച്ചു. ജില്ലാ ലീഗൽ സർവിസസ് അതോറിറ്റി സെക്രട്ടറി പ്രവകുമാർ ജി., ചൈൽഡ് വെൽഫെയർ കമ്മിറ്റി അംഗം ജോമോൻ മാത്യു, ക്രൈംബ്രാഞ്ച് ഡിവൈഎസ്പി സജു വർഗീസ്, ഡെപ്യൂട്ടി എക്സൈസ് കമ്മീഷണർ ആർ. ജയചന്ദ്രൻ, ജില്ലാ വനിതാ ശിശു വികസന ഓഫീസർ റ്റിജു റേച്ചൽ തോമസ്, ഡെപ്യൂട്ടി ഡയറക്ടർ ഓഫ് എഡ്യൂക്കേഷനിലെ ഉദ്യോഗസ്ഥനായ ബിജു വർഗീസ്, ഡെപ്യൂട്ടി ലേബർ ഓഫീസർ ശാലിനി രാധ എസ് നായർ, ജില്ലാ ശിശു സംരക്ഷണ ഓഫീസർ ബീന സി. ജെ. എന്നിവർ ബേക്കർ മെമ്മോറിയൽ സ്കൂൾ, സെന്റ് ജോസഫ്സ് ഗേൾസ് സ്കൂൾ, ഗവൺമെന്റ് മോഡൽ സ്കൂൾ കോട്ടയം, സെന്റ് ആൻസ് ഗേൾസ് ഹൈസ്കൂൾ, എംടി സെമിനാരി ഹയർസെക്കൻഡറി സ്കൂൾ, എം. ഡി സെമിനാരി HSS, മൗണ്ട് കാർമൽ സ്കൂൾ കഞ്ഞിക്കുഴി, എസ് എച്ച് മൗണ്ട് ഹയർസെക്കൻഡറി സ്കൂൾ നട്ടാശ്ശേരി എന്നീ സ്കൂളുകളിലെ കുട്ടികളുമായി സംവദിച്ചു. ജില്ലയിലെ ശിശു സംരക്ഷണ കർത്തവ്യ വാഹകരായ വകുപ്പ് മേധാവികളോട് കുട്ടികളുടെ അവകാശങ്ങളെ സംബന്ധിച്ചും പ്രശ്നങ്ങളെ സംബന്ധിച്ചും കുട്ടികൾ ചോദ്യങ്ങൾ ചോദിക്കുകയും വകുപ്പുതല മേധാവികൾ കുട്ടികൾക്ക് ഉത്തരം നൽകുകയും ചെയ്തു. പരിപാടിയിൽ ജില്ലാ ശിശു സംരക്ഷണ ഓഫീസർ ബീന സിജെ സ്വാഗതം ആശംസിച്ചു. എം ഡി സെമിനാരി ഹയർ സെക്കൻഡറി സ്കൂൾ പ്രിൻസിപ്പൽ ഡോ. ജേക്കബ് ജോൺ ആശംസകൾ അർപ്പിച്ചു സംസാരിച്ചു. പ്രൊട്ടക്ഷൻ ഓഫീസർ അഞ്ജു മോൾ സ്കറിയ നന്ദി അർപ്പിച്ചു സംസാരിച്ചു.
