ബിരുദാന്തരദ-ബിരുദ പ്രോഗ്രാമുകൾ സംയുക്തമായി നടത്താൻ എം.ജി – കണ്ണൂർ സർവ്വകലാശാലകൾ തമ്മിൽ ധാരണ

കോട്ടയം : എം.എസ്.സി. നാനോ സയൻസ് ആന്റ് നാനോ ടെക്‌നോളജി (ഫിസിക്‌സ് / കെമിസ്ട്രി),  ഇൻഡസ്ട്രിയൽ ബയോ പ്രോസസിംഗ് പ്രത്യേക വിഷയമായുള്ള എം.എസ്.സി. ബയോടെക്‌നോളജി പ്രോഗ്രാമുകൾ സംയുക്തമായി നടത്തുന്നതിന് എം.ജി., കണ്ണൂർ സർവ്വകലാശാലകൾ തമ്മിൽ ധാരണയായി.  മഹാത്മാഗാന്ധി സർവ്വകലാശാല ആസ്ഥാനത്ത് വൈസ് ചാൻസലർ പ്രൊഫ. സാബു തോമസ്, പ്രൊ-വൈസ് ചാൻസലർ പൊഫ. സി.റ്റി. അരവിന്ദകുമാർ എന്നിവരുടെ സാന്നിദ്ധ്യത്തിൽ എം.ജി. സർവ്വകലാശാല രജിസ്ട്രാർ പ്രൊഫ. പ്രകാശ് കുമാർ ബി., കണ്ണൂർ സർവ്വകലാശാല രജിസ്ട്രാർ പ്രൊഫ. ജോബി കെ.. ജോസ് എന്നിവർ ധാരണാ പത്രത്തിൽ ഒപ്പിട്ടു.

സംയുക്ത പ്രോഗ്രാമുകളിൽ ചേരുന്ന വിദ്യാർത്ഥികളുടെ അധ്യയനം, പരീക്ഷാ നടത്തിപ്പ്, സർട്ടിഫിക്കറ്റ് വിതരണം തുടങ്ങിയവ സംബന്ധിച്ച പൂർണ ഉത്തരവാദിത്വം ഇതിനായി അവർ ആദ്യമായി രജിസ്റ്റർ ചെയ്ത സർവ്വകലാശാലക്കായിരിക്കും.  എന്നാൽ ഒന്നിടവിട്ട സെമസ്റ്ററുകളിൽ ഇരു സർവ്വകലാശാലകളിലെയും അധ്യയനത്തിനായി വിദ്യാർത്ഥകളെ പരസ്പരം കൈമാറുന്നതിനും ഇരു സംസ്ഥാനങ്ങളിലുമുള്ള ക്ലാസ്സ്മുറികൾ, ലാബോറട്ടറി, ലൈബ്രറി സൗകര്യങ്ങൾ പൂർണമായും വിനിയോഗിക്കുന്നതിനും ധാരണാ പത്രം വ്യവസ്ഥ ചെയ്യുന്നു.

ഈ പ്രോഗ്രാമുകളിലേക്കുള്ള പ്രവേശനം ഒരു പൊതു പ്രവേശന പരീക്ഷയുടെ അടിസ്ഥാനത്തിലായിരിക്കും.  സംയുക്ത പ്രോഗ്രാമുകൾക്ക് മാത്രമായി ഒരു പൊതു സിലബസ്സും അക്കാദമിക് കലണ്ടറും തയ്യാറാക്കാനും തീരുമാനിച്ചിട്ടുണ്ട്.  തുടർ പഠനത്തിനായി തില്യതാ സർട്ടിഫിക്കറ്റുകളും ദേശീയതലത്തിലുള്ള വിവിധ മത്സരപരീക്ഷകൾക്ക് അർഹതയും ഉറപ്പാക്കുന്ന വിധത്തിൽ സിലബസ് തയ്യാറാക്കാനാണ് നർദ്ദേശിച്ചിട്ടുള്ളത്.

വിദ്യാർത്ഥി പ്രോഗ്രാമിനായി ആദ്യം രജിസ്റ്റർ ചെയ്ത സർവ്വകലാശാലക്കായിരിക്കും സർട്ടിഫിക്കറ്റ് നൽകുന്നതിനുള്ള ഉത്തരവാദിത്വമെങ്കിലും കോഴ്‌സ് ഇരു സർവ്വകലാശാലകളും സംയുക്താടിസ്ഥാനത്തിൽ നടത്തിയിട്ടുള്ളതാണെന്ന് സർട്ടിഫിക്കറ്റിൽ പ്രത്യേകം രേഖപ്പെടുത്തിയിരിക്കണം.

വൈസ് ചാൻസലറുടെ ചേംബറിൽ നടന്ന ചടങ്ങിൽ കണ്ണൂർ സർവ്വകലാശാല നാനോ സയൻസ് വിഭാഗം കോ-ഓർഡിനേറ്റർ പ്രൊഫ. എസ്. സുധീഷ്, ബയോടെക്‌നോളജി വിഭാഗം കോ-ഒർഡിനേറ്റർ പ്രൊഫ. അനൂപ് കേശവൻ, കെമിസ്ട്രി വിഭാഗം മേധാവി ഡോ. ബൈജു കെ.വി. മഹാത്മാഗാന്ധി സർവ്വകലാശാല ബയോ സയൻസസ് വിഭാഗം മേധാവി പ്രൊഫ. എം.എസ്. ജിഷ, പ്രോഗ്രാം കോ-ഓർഡിനേറ്റർ പ്രൊഫ. കെ ജയചന്ദ്രൻ, നാനോ-സയൻസ്-ടെക്‌നോളജി വിഭാഗം പ്രോഗ്രാം കോ-ഓർഡിനേറ്റർ ഡോ. എ.എസ്. ശ്രീകല തുടങ്ങിയവർ പങ്കെടുത്തു