വീടുകളിലെ ബാത്ത് റൂമിന്റെ എണ്ണവും ലക്ഷണവും സമ്പത്തും തമ്മിൽ ബന്ധമുണ്ടോ..! ഈ കാര്യങ്ങൾ ശ്രദ്ധിച്ചാൽ വീട്ടിലെ സമ്പത്തും സൗകര്യങ്ങളും വർദ്ധിക്കും

വെൽനെസ് ഡെസക്
ജാഗ്രതാ ന്യൂസ്
വീടുകളിൽ ബാത്‌റൂം എന്നത് ആഡംബരത്തിന്റെ ഭാഗമായി മാറിക്കഴിഞ്ഞിരിക്കുകയാണ്. ഗൃഹത്തിനുള്ളിലെ ബാത്‌റൂമിനെ പറ്റി വാസ്തുശാസ്ത്രത്തിൽ പ്രതിപാദിക്കുന്നില്ല. എങ്കിലും ആധുനിക ജീവിതത്തിൽ ഇത് ഒഴിച്ചുകൂടാൻ കഴിയാത്ത ഒന്നാണ്. ഇക്കാലത്ത് ഡ്രൈ ഏരിയ, വെറ്റ് ഏരിയ എന്നിങ്ങനെ തരംതിരിച്ച് വീട്ടിലെ ഏറ്റവും ആർഭാടം നിറഞ്ഞ ഭാഗമായി ബാത്‌റൂം മാറിയിട്ടുണ്ട്.

വീടിന്റെ നാല് മൂലകളിലും വരാൻ പാടില്ല എന്നുള്ളതാണ് ബാത്‌റൂം നിർമിക്കുമ്പോൾ ഏറ്റവുമധികം ശ്രദ്ധിക്കേണ്ട കാര്യം. സ്ഥലപരിമിതി കാരണം മൂലകളിൽ ബാത്‌റൂം സ്ഥാപിക്കണമെന്നുണ്ടെങ്കിൽ കോൺ ഭാഗത്തുനിന്ന് അല്പം സ്ഥലം വിട്ടോ ഡ്രസിംഗ് ഏരിയ തിരിച്ചോ പണിയാം. വടക്കോട്ടോ തെക്കോട്ടോ തിരിഞ്ഞിരിക്കാവുന്ന രീതിയിലാവണം ക്ലോസെറ്റിന്റെ സ്ഥാനം. ബാത്‌റൂമിലെ കണ്ണാടി ഒരിക്കലും വടക്കോട്ടു തിരിഞ്ഞാവരുത്. ബാത്‌റൂമിന്റെ നാലുചുവരുകളിൽ ഒരെണ്ണം വീടിന്റെ പുറംഭിത്തി ആയിരിക്കണം. ആവശ്യത്തിന് വായുസഞ്ചാരവും വെളിച്ചവുമുണ്ടായിരിക്കണം. കഴിവതും ബാത്‌റൂമിന്റെ വാതിൽ എപ്പോഴും അടച്ചിടാൻ ശ്രദ്ധിക്കണം. വീട്ടിൽ ഏറ്റവുമധികം നെഗറ്റീവ് ഊർജം ഉണ്ടാവാൻ സാദ്ധ്യതയുള്ള സ്ഥലമാണ് ബാത്‌റൂം അതിനാൽ തേച്ചുകഴുകി അണുനാശിനി തളിച്ച് വൃത്തിയായി സൂക്ഷിക്കണം. ബാത്റൂമിൽ പോസിറ്റീവ് ഊർജം നിലനിർത്താൻ ഒരു ബൗളിൽ കുറച്ച് ഉപ്പുകല്ല് നനവുതട്ടാത്ത രീതിയിൽ വയ്ക്കണം. ഉപ്പ് അലുത്തുകഴിഞ്ഞാൽ മാറ്റി നിറയ്ക്കാനും മറക്കരുത്.

വീടിന്റെ ദർശനം ഏതു ഭാഗത്തേക്കാണോ അതിന്റെ എതിർവശത്ത് വീടിന്റെ മദ്ധ്യഭാഗത്തായി ബാത്‌റൂം വരാൻ പാടില്ല. അതായത് വടക്കോട്ടു ദർശനമുള്ള വീടിന്റെ തെക്കുഭാഗത്ത് മദ്ധ്യത്തിലായി ബാത്‌റൂം പണിയരുത്. ഭവനത്തിലെ ധനാഗമനത്തെ ബാധിക്കുന്നതിനാൽ കഴിവതും ബാത്‌റൂമിലെ എണ്ണം മൂന്നിൽ കൂടരുത്. ബാത്‌റൂമിനോട് അനുബന്ധിച്ചുള്ള സെപ്റ്റിക് ടാങ്കുകളുടെ സ്ഥാനവും വളരെയധികം ശ്രദ്ധിക്കണം. ഭവനത്തിന്റെ നാല് മൂലകളും മദ്ധ്യഭാഗങ്ങളും തെക്കുവശവും ഒഴിച്ച് മറ്റുഭാഗങ്ങളിൽ സ്ഥാനം നൽകാം. വീടിനോടു ചേർന്നുള്ള കാർപോർച്ചിനടിയിലും മറ്റും സെപ്റ്റിക് ടാങ്ക് നൽകാതിരിക്കുക. വടക്കു പടിഞ്ഞാറേ മൂലയിൽ നിന്ന് പടിഞ്ഞാറോട്ടു മാറി സെപ്റ്റിക് ടാങ്ക് നല്കുന്നതാണ് ഏറ്റവും ഉത്തമം.