കേരളത്തിൽ ഗവർണർ കണ്ണൂർ സർവകലാശാലാ പോര് മുറുകുന്നതിനിടെ കേരളത്തിലെ വ്യാജ സർവകലാശാലയുടെ പേര് പുറത്ത്; രാജ്യത്ത് 21 സർവകലാശാലകൾ വ്യാജം; കേരളത്തിൽ നിന്ന് ഒന്ന് മാത്രം

ന്യൂഡൽഹി: കണ്ണൂർ അടക്കമുള്ള സർവകലാശാലകളിലെ നിയമനത്തെച്ചൊല്ലി സംസ്ഥാനത്ത് ഗവർണറും സർക്കാരും തമ്മിൽ പോര് നടക്കുന്നതിനിടെ , സംസ്ഥാനത്തെ വ്യാജ സർവകലാശാലയുടെ പേര് പുറത്ത്. യുജിസി പുറത്തു വിട്ട
രാജ്യത്ത് പ്രവർത്തിക്കുന്ന 21 സർവകലാശാലകളുടെ പട്ടികയിലാണ് കേരളത്തിലെ ഒരു സർവകലാശാലയുടെ പേരും ഉൾപ്പെട്ടത്. ഡൽഹിയും ഉത്തർപ്രദേശും കേന്ദ്രീകരിച്ചാണ് ഭൂരിഭാഗം വ്യാജസർവകലാശാലകളും പ്രവർത്തിക്കുന്നത്.

ഈ സർവകലാശാലകൾക്ക് ബിരുദ സർട്ടിഫിക്കറ്റുകൾ നൽകാൻ യോഗ്യതയില്ലെന്നും യു.ജി.സി സെക്രട്ടറി രാജ്നിഷ് ജെയ്ൻ അറിയിച്ചു. പട്ടികയിൽ കേരളത്തിലെ സെന്റ് ജോൺസ് സർവകലാശാലയും ഉൾപ്പെടുന്നു. ഡൽഹിയിൽ മാത്രം എട്ടു വ്യാജസർവകലാശാലകളുണ്ട്. ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് പബ്ലിക് ആൻഡ് ഫിസിക്കൽ ഹെൽത്ത് സയൻസസ്, ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് ആൻഡ് എൻജിനീയറിംഗ്, വിശ്വകർമ്മ ഓപ്പൺ സർവകലാശാല ഉൾപ്പെടെയുള്ള സർവകലാശാലകളാണ് അനധികൃതമായി പ്രവർത്തിക്കുന്നത് .ഗാന്ധി ഹിന്ദി വിദ്യാപീഠം, നാഷണൽ യൂണിവേഴ്‌സിറ്റി ഓഫ് ഇലക്ട്രോ കോംപ്ലക്‌സ് ഹോമിയോപ്പതി ഉൾപ്പെടെ ഏഴു സർവകലാശാലകളാണ് ഉത്തർപ്രദേശിൽ നിയമവിരുദ്ധമായി പ്രവർത്തിക്കുന്നത്.

കേരളത്തിന് പുറമേ മഹാരാഷ്ട്ര, പുതുച്ചേരി, ആന്ധ്രാപ്രദേശ്, ഒഡീഷ, പശ്ചിമ ബംഗാൾ എന്നിവിടങ്ങളിലും ഓരോ സർവകലാശാലകൾ അനധികൃതമായി പ്രവർത്തിക്കുന്നതായും യു.ജി.സിയുടെ വാർത്താക്കുറിപ്പിൽ പറയുന്നു.