കോട്ടയം പള്ളം കരിമ്പിൻകാല ടേസ്റ്റ് ലാൻഡ് ഷാപ്പിനു മുന്നിലുണ്ടായ അപകടം: പരിക്കേറ്റത് 13 യാത്രക്കാർക്ക്; പരിക്കേറ്റത് ചങ്ങനാശേരി, കുളനട സ്വദേശികൾക്ക്: അപകടത്തിന്റെ സിസിടിവി ക്യാമറാ ദൃശ്യം കാണാം

കോട്ടയം: പള്ളം കരിമ്പിൻകാല ടേസ്റ്റ് ലാൻഡ് ഷാപ്പിനു മുന്നിലുണ്ടായ അപകടത്തിൽ പരിക്കേറ്റത് 13 പേർക്ക്. പത്തനംതിട്ട കുളനട , ചങ്ങനാശേരി സ്വദേശികൾ സഞ്ചരിച്ച വാഹനമാണ് അപകടത്തിൽപ്പെട്ടത്. അപകടത്തിൽ ഉൾപ്പെട്ട ആരുടെയും പരിക്ക് ഗുരുതരമല്ല. അപകടത്തിനിടയാക്കിയ ക്വിഡ് കാറിൽ സഞ്ചരിച്ച പത്തനംതിട്ട കുളനട ക്രസന്റ് കോട്ടേജിൽ ഫാത്തിമ (43), മാതാവ് ഐഷാ ബീവി (62), മകൾ അഫ്രീൻ (8), ഹുണ്ടായ് ഐ 20 കാറിൽ സഞ്ചരിച്ച ചങ്ങനാശേരി മലകുന്നം പാറേപ്പറമ്പിൽ മത്തായി (64), ഭാര്യ അന്നമ്മ (62), മറ്റൊരു ഹുണ്ടായ് ഐ 20 കാറിൽ സഞ്ചരിച്ചിരുന്ന ചങ്ങനാശേരി ളായിക്കാട് തോട്ടശേരിൽ വീട്ടിൽ ജോസ് ആന്റണി (65), ചങ്ങനാശേരി ചീരംചിറ ചീരംചിറകന്നപ്പള്ളി ലൂസിയാമ്മ (68), ജെന്നി (മൂന്ന്), സേറാ (മൂന്ന്), ലിറ്റി (46), ലിന്റ (35), എഞ്ചൽ (18), റോബിൻ എന്നിവർക്കാണ് പരിക്കേറ്റത്. അപകടത്തിൽ പരിക്കേറ്റ ജോസ് ആന്റണി കോട്ടയം കിംസ് ആശുപത്രിയിൽ ചികിത്സ തേടി. മറ്റുള്ളവരെല്ലാം കോട്ടയം മെഡിക്കൽ കോളേജ് ആശുപത്രിയിലാണ് ചികിത്സ തേടിയത്.

കരിമ്പിൻകാലാ ഷാപ്പിൽ നിന്നുള്ള സിസിടിവി ക്യാമറാ ദൃശ്യങ്ങൾ ലഭിച്ചതോടെയാണ് അപകടത്തിന്റെ കൃത്യമായ വിവരങ്ങൾ പുറത്തു വന്നിരിക്കുന്നത്. കോട്ടയം പള്ളം കരിമ്പിൻകാലാ ടേസ്റ്റ് ലാൻഡ് ഷാപ്പ് റസ്റ്ററന്റിനു മുന്നിലെ റോഡിലാണ് ശനിയാഴ്ച വൈകിട്ട് 4.15 ഓടെ അപകടം ഉണ്ടായത്. ചങ്ങനാശേരി ഭാഗത്തു നിന്നും എത്തിയ കാർ എതിർ ദിശയിലേയ്ക്കു തെന്നി മാറി, ആദ്യം മുന്നിൽ പോയ കാറിന്റെ പിന്നിൽ ഇടിക്കുന്നത് വീഡിയോയിൽ വ്യക്തമായി കാണാം. ചങ്ങനാശേരി ഭാഗത്തു നിന്നും എത്തിയ കാർ ഇടിച്ച കാർ റോഡിൽ കറങ്ങിയ ശേഷം എതിർ ദിശയിൽ നിന്നും എത്തിയ സ്വകാര്യ ടൂറിസ്റ്റ് ബസിന്റെ ടയറിൽ ഇടിച്ച് വട്ടം കറങ്ങുന്നതും വീഡിയോയിൽ വ്യക്തമായി കാണാം. അപകടത്തെ തുടർന്നു പത്തോളം യാത്രക്കാർക്കാണ് പരിക്കേറ്റിരിക്കുന്നത്.

കനത്ത മഴയിൽ തെന്നിക്കിടന്ന റോഡിലുടെ അമിത വേഗത്തിൽ എത്തിയ കാറാണ് അപകടത്തിന് ഇടയാക്കിയതെന്നാണ് ക്യാമറാ ദൃശ്യങ്ങളിൽ നിന്നും വ്യക്തമായിരിക്കുന്നത്. ആദ്യം ഒരു കാറിൽ ഇടിച്ച ഈ കാർ നിയന്ത്രണം നഷ്ടമായി മുന്നിൽ നിന്നും എത്തിയ കാറിലേയ്ക്ക് ദിശ തെറ്റിച്ചെത്തി നേർക്കുനേർ ഇടിക്കുകയായിരുന്നു. അപകടത്തെ തുടർന്നു എം.സി റോഡിൽ ഗതാഗതം ഏതാണ്ട് പൂർണമായും തടസപ്പെട്ടു.

കനത്ത മഴയിൽ തെന്നിക്കിടന്ന റോഡിൽ അശ്രദ്ധമായി വാഹനം ഓടിച്ചതാണ് അപകടകാരണമെന്നാണ് സംശയിക്കുന്നത്. അപകടം നടന്നത് കനത്ത മഴയ്ക്കു തൊട്ടു പിന്നാലെയായിരുന്നു. ആ സാഹചര്യത്തിൽ മഴയിൽ റോഡിലൂടെ വാഹനങ്ങൾ ഓടിക്കുമ്പോൾ ശ്രദ്ധിക്കണമെന്നാണ് മോട്ടോർ വാഹന വകുപ്പും, പൊലീസും നൽകുന്ന നിർദേശം.