മൂലവട്ടം: ഈരയിൽക്കടവ് ബൈപ്പാസ് റോഡിൽ നിയന്ത്രണം നഷ്ടമായ കാർ റോഡരികിലേയ്ക്കു മറിഞ്ഞു. അപകടത്തെ തുടർന്നു എം.ടി സ്‌കൂൾ അധ്യാപകരും, കളക്ടറേറ്റ് ജീവനക്കാരനും അടക്കം മൂന്നു പേർക്ക് പരിക്കേറ്റു. എം.ഡി സ്‌കൂളിലെ അധ്യാപകരായ കൊട്ടാരക്കര സ്വദേശി ബിജു (42) മുട്ടമ്പലം തൈക്കടവിൽ മാത്യു (48), മൂലവട്ടം നെടുമ്പുരയിടത്തിൽ റോഷൻ ഐസക്ക് ജോൺ (37) എന്നിവർക്കാണ് പരിക്കേറ്റത്. ഇവരെ പരിക്കുകളോടെ കോട്ടയം ജില്ലാ ജനറൽ ആശുപത്രിയിൽ പ്രവേശിപ്പിച്ചു.
തിങ്കളാഴ്ച രാത്രി 12 മണിയോടെ ഈരയിൽക്കടവ് ബൈപ്പാസ് റോഡിലായിരുന്നു അപകടം. ഈരയിൽക്കടവ് ഭാഗത്തു നിന്നും മണിപ്പുഴ ഭാഗത്തേയ്ക്കു വരികയായിരുന്നു കാർ. ഈ സമയം മണിപ്പുഴ ജംഗ്ഷനിലേയ്ക്കു തിരിയുന്ന ഭാഗത്തിനു മുൻപുള്ള വളവിൽ നിയന്ത്രണം നഷ്ടമായ കാർ, റോഡരികിലേയ്ക്കു തല കീഴായി മറിയുകയായിരുന്നു. ഓടിക്കൂടിയ നാട്ടുകാർ ചേർന്നാണ് പരിക്കേറ്റ മൂന്നു പേരെയും ആശുപത്രിയിൽ പ്രവേശിപ്പിച്ചത്. ആരുടെയും പരിക്ക് ഗുരുതരമല്ല.
