തിരുവല്ല : പരുമല തിരുവാർമംഗലം ക്ഷേത്ര കവർച്ച കേസിലെ പ്രതി മാന്നാർ പോലീസിന്റെ പിടിയിലായി. സ്ഥിരം മോഷ്ടാവും തൃശൂർ സ്വദേശിയുമായ സതീശൻ (35) ആണ് പിടിയിലായത് . മാന്നാർ പോലീസ് സ്റ്റേഷൻ പരിധിയിൽ നടന്ന മറ്റൊരു മോഷണം കേസുമായി ബന്ധപ്പെട്ട് നടത്തിയ അന്വേഷണത്തിലാണ് പ്രതി വലയിലായത് . തിരുവാർമംഗലം ക്ഷേത്രം അടക്കം പരുമല പുളിക്കീഴ് സ്റ്റേഷൻ അതിർത്തികളിലായി നിരവധി മോഷണങ്ങൾ നടത്തിയതായി ഇയാൾ പോലീസിനോട് സമ്മതിച്ചിട്ടുണ്ട്. ഈ മാസം ഒമ്പതാം തീയതി ആയിരുന്നു തിരുവാർമംഗലം ക്ഷേത്ര തിടപള്ളി കുത്തിത്തുടർന്ന് അരലക്ഷത്തോളം രൂപ വില വരുന്ന ഓട്ടുപകരണങ്ങൾ ഇയാൾ മോഷ്ടിച്ചത്. സിസിടിവിയിൽ പതിഞ്ഞ മോഷ്ടാവിന്റെ ദൃശ്യം കേന്ദ്രീകരിച്ച് നടത്തിയ അന്വേഷണത്തിലാണ് പ്രതി കൊട്ടാരക്കരയിൽ നിന്നും പിടിയിലായത് . ഇയാൾക്കെതിരെ വിവിധ സ്റ്റേഷനുകളിലായി നാല്പതോളം മോഷണക്കേസുകൾ നിലവിലുണ്ടെന്ന് എസ് ഐ പറഞ്ഞു. ക്ഷേത്രമോഷണ കേസിൽ പ്രതിയെ അടുത്ത ദിവസം കസ്റ്റഡിയിൽ വാങ്ങുമെന്ന് പുളിക്കീഴ് പോലീസ് പറഞ്ഞു.
പരുമല തിരുവാർമംഗലം ക്ഷേത്ര കവർച്ച കേസ്: പ്രതി മാന്നാർ പോലീസ് പിടിയിൽ
