കോട്ടയം : പൂഞ്ഞാർ ഏറ്റുമാനൂർ സംസ്ഥാന പാതയിൽ കിടങ്ങൂർ കാച്ചിറയ്ക്ക് സമീപം വാഹനാപകടത്തിൽ ബൈക്ക് യാത്രികന് പരിക്ക്. കാറും ബൈക്കും കൂട്ടിയിടിച്ചായിരുന്നു അപകടം. ഞായറാഴ്ച രാത്രി 7 മണിയോടെ കടച്ചിറയിൽ നിന്നും കൊട്ടാരം ക്ഷേത്രത്തിലേക്ക് തിരിയുന്ന ഭാഗത്താണ് അപകടം ഉണ്ടായത്. ഏറ്റുമാനൂർ ഭാഗത്ത് നിന്നും വന്ന കാർ കൊട്ടാരം ക്ഷേത്രത്തിലേക്ക് പോകുന്ന കോട്ടവഴി റോഡിലേക്ക് തിരിയുമ്പോൾ എതിർ ദിശയിൽ നിന്നും വന്ന ബൈക്ക് കാറിൽ ഇടിക്കുകയായിരുന്നു.
കാർ തിരിയുന്നത് കണ്ട് ബൈക്ക് നിർത്താൻ ശ്രമിച്ചെങ്കിലും നിയന്ത്രണം നഷ്ടപ്പെട്ട് കാറിൽ ഇടിച്ച ശേഷം റോഡരികിലെ മതിലിനും ഇരുമ്പ് പോസ്റ്റിനും ഇടയിൽ കുടുങ്ങി നിൽക്കുകയായിരുന്നു. അപകടത്തിൽ ബൈക്ക് യാത്രികനായ യുവാവിന്റെ കാലിന് പരിക്ക് പറ്റി. ഇയാളെ ആശുപത്രിയിൽ പ്രവേശിപ്പിച്ചു. കാറിന്റെ മുൻഭാഗം തകരുകയും ബൈക്കിന് സാരമായ കേടുപാടുകൾ സംഭവിക്കുകയും ചെയ്തു
