ബസേലിയസ് കോളജ് വജ്രബൂബിലി ആഘോഷങ്ങൾ : സൗത്ത് ഇന്ത്യൻ ഇന്റർകോളജ് ഫുട്ബോൾ മത്സരം ആരംഭിച്ചു

കോട്ടയം : ബസേലിയസ് കോളജ് വജ്രബൂബിലി ആഘോഷങ്ങളുടെ ഭാഗമായിട്ടുള്ള ബസേലിയസ് എവറോളിങ് ട്രോഫിക്കുവേണ്ടിയുള്ള സൗത്ത് ഇന്ത്യൻ ഇന്റർകോളജ് ഫുട്ബോൾ മത്സരം ആരംഭിച്ചു. സംസ്ഥാന ചലച്ചിത്രപുരസ്‌കാരജേതാവും പൂർവവിദ്യാർഥിയുമായ സന്തോഷ് ടി. കുരുവിള ഉദ്ഘാടനം ചെയ്തു. കോളജ് പ്രിൻസിപ്പൽ ഇൻ ചാർജ് ഡോ. പി. ജ്യോതിമോൾ അധ്യക്ഷത വഹിച്ചു. 

ജനറൽ കൺവീനർ ലിജോ സെബാസ്റ്റിയൻ, സെക്രട്ടറി ഡോ. ജോജി എം. ഫിലിപ്പ്, ഡോ. തോമസ് കുരുവിള എന്നിവർ പ്രസംഗിച്ചു. ഉദ്ഘാടന മത്സരത്തിൽ തിരുവല്ല മാർത്തോമ്മാ കോളജും ബസേലിയസ് കോളജ് ബ്ലൂ ടീമും തമ്മിൽ ഏറ്റുമുട്ടി. മത്സരസമയം അവസാനിക്കുമ്പോൾ ഇരു ടീമുകളും ഓരോ ഗോളുകൾ നേടി സമനിലയിൽ എത്തി. പിന്നീട് പെനാലിറ്റി ഷൂട്ടൗട്ടിൽ മൂന്നിനെതിരെ നാലുഗോളുകൾക്ക് തിരുവല്ല മാർത്തോമ്മാ കോളജ്, ബസേലിയസ് കോളജ് ബ്ലൂ ടീമിനെ പരാജയപ്പെടുത്തി.

ആഗസ്റ്റ് 12 ന് രാവിലെ 8ന് നടക്കുന്ന മത്സരത്തിൽ ഉഴവൂർ സെന്റ് സ്റ്റീഫൻസ് കോളജും ബസേലിയസ് കോളജ് ഗ്രീൻ ടീമും തമ്മിൽ ഏറ്റുമുട്ടും. തുടർന്ന് 9.30ന് നടക്കുന്ന മത്സരത്തിൽ തേവര എസ്.എച്ച് കോളജ്, ചങ്ങനാശേരി എസ്.ബി കോളജിനെ നേരിടും. വൈകിട്ട് 3.30ന് നടക്കുന്ന മത്സരത്തിൽ എറണാകുളം മഹാരാജാസ് കോളജും ബസേലിയസ് കോളജ് റെഡ് ടീമും തമ്മിൽ മത്സരിക്കും. പുരുഷവിഭാഗം ബാസ്‌കറ്റ് ബോൾ മത്സരം 14ന് 2.30നും വനിതാവിഭാഗം ബാസ്‌കറ്റ് ബോൾ മത്സരം 17ന് രാവിലെ 9നും ആരംഭിക്കും.