തിരുവനന്തപുരം: കേരളത്തിൽ നേതാക്കളുടെ ധാർഷ്ട്യം തെരഞ്ഞെടുപ്പിലെ തിരിച്ചടിക്ക് കാരണമായിട്ടുണ്ടെന്ന് വിലയിരുത്തി സിപിഎം കേന്ദ്ര കമ്മിറ്റി. നേതാക്കളുടേയും അണികളുടേയും പെരുമാറ്റം പാർട്ടിയെ ജനങ്ങളിൽ നിന്ന് അകറ്റി. ശക്തികേന്ദ്രങ്ങളിൽ പോലും ബിജെപി കടന്ന് കയറിയെന്നും കേന്ദ്ര കമ്മിറ്റി അംഗീകരിച്ച അവലോകന റിപ്പോർട്ടിൽ പറയുന്നു.
നേതാക്കള്‍ക്ക് നേരെ രൂക്ഷഭാഷയിലാണ് സിപിഎം കേന്ദ്രകമ്മിറ്റി വിമര്‍ശനമുന്നയിച്ചത്. നേതാക്കൾക്ക് ധാർഷ്ട്യമെന്ന് വിമർശിച്ച കേന്ദ്രകമ്മിറ്റി നേതാക്കളുടെയും അണികളുടെയും പെരുമാറ്റം മോശമാണെന്നും സിസി തെരഞ്ഞെടുപ്പ് അവലോകന റിപ്പോർട്ടിൽ പരാമർശിച്ചു. ബിജെപിയും കോൺഗ്രസും സോഷ്യൽ മീഡിയയെ നന്നായി ഉപയോഗിച്ചപ്പോൾ സിപിഎം നിലവാരം പുലർത്തിയില്ലെന്നായിരുന്നു സോഷ്യൽ മീഡിയ ഇടപെടലിനെക്കുറിച്ചുള്ള കേന്ദ്രകമ്മിറ്റിയുടെ വിമർശനം. സോഷ്യൽ മീഡിയ ഇടപെടൽ രീതി പുനപരിശോധിക്കണമെന്നും സിസി ആവശ്യപ്പെട്ടു. സഹകരണ ബാങ്കുകളിലെയും തദ്ദേശ സ്ഥാപനങ്ങളിലെയും അഴിമതി തിരിച്ചടിച്ചെന്നും കേന്ദ്രകമ്മിറ്റി അവലോക റിപ്പോര്‍ട്ടില്‍ പറഞ്ഞു.
