കോട്ടയം: ചങ്ങനാശേരിയിലെ ദൃശ്യം മോഡൽ കൊലപാതകത്തിൽ ഒരു പ്രതി കൂടി പിടിയിൽ. ഇതോടെ പിടിയിലായ പ്രതികളുടെ എണ്ണം നാലായി. കേസിലെ പ്രധാന പ്രതിയായ മുത്തുകുമാറിനെ കൊലക്കേസിൽ സഹായിച്ച മാങ്ങാനം സ്വദേശി വരുൺകുമാറിനെയാണ് പൊലീസ് അറസ്റ്റ് ചെയ്തത്. എന്നാൽ, ഇയാളുടെ പങ്കു സംബന്ധിച്ചു കൃത്യമായി വെളിപ്പെടുത്തൽ നടത്താൻ പൊലീസ് തയ്യാറായിട്ടില്ല. ഇതിനിടെ കേസിൽ കോയമ്പത്തൂരിൽ നിന്നും അറസ്റ്റിലായ കോട്ടയം പുതുപ്പള്ളി മാങ്ങാനം സ്വദേശികളായ ബിബിൽ ബിനോയ് എന്നിവരെ കൊലപാതകം നടന്ന സ്ഥലത്ത് എത്തിച്ച് പൊലീസ് സംഘം തെളിവെടുപ്പ് നടത്തി.
കോട്ടയം ജില്ലാ പൊലീസ് മേധാവി കെ.കാർത്തികിന്റെ നേതൃത്വത്തിലുള്ള പൊലീസ് സംഘമാണ് കേസിലെ മറ്റു പ്രതികളെ അറസ്റ്റ് ചെയ്തത്. ആലപ്പുഴ സ്വദേശിയായ ബിന്ദുകുമാറിനെ ഇയാളുടെ സുഹൃത്തായ മുത്തുകുമാർ ചങ്ങനാശേരി പൂവത്തെ വീട്ടിലേയ്ക്കു വിളിച്ചു വരുത്തിയ ശേഷം കൊലപ്പെടുത്തുകയായിരുന്നുവെന്നാണ് വിവരം.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
സംഭവത്തിൽ ഉൾപ്പെട്ട പ്രതികൾ വാർത്ത പുറത്ത് വന്നതിന് പിന്നാലെ തന്നെ സംസ്ഥാനത്തിനു പുറത്തേയ്ക്കു കടന്നിരുന്നു. തുടർന്നു ജില്ലാ പൊലീസ് മേധാവിയുടെ നേതൃത്വത്തിൽ പ്രത്യേക അന്വേഷണ സംഘം രൂപീകരിച്ച് അന്വേഷണം ആരംഭിക്കുകയായിരുന്നു. തുടർന്നാണ് കോയമ്പത്തൂരിലേയ്ക്കു കടന്ന പ്രതികളെ പൊലീസ് സംഘം പിടികൂടിയത്.
ഭാര്യയുമായുള്ള ബന്ധം സംശയിച്ച് പ്രതിയായ മുത്തുകുമാർ ബിന്ദുകുമാറിനെ വീട്ടിലേയ്ക്കു വിളിച്ചു വരുത്തിയ ശേഷം കൊലപ്പെടുത്തി വീടിനുള്ളിൽ അടുക്കള ഭാഗത്തോട് ചേർന്ന് കുഴിയെടുത്ത് കോൺക്രീറ്റ് ചെയ്ത് മൂടുകയായിരുന്നു. സംഭവത്തിൽ ഉൾപ്പെട്ട പ്രധാനപ്രതിയായ മുത്തുകുമാറിനെ സംഭവ ദിവസം തന്നെ പൊലീസ് സംഘം പിടികൂടിയിരുന്നു. ഇതേ തുടർന്ന് വിശദമായ അന്വേഷണത്തിന് ഒടുവിലാണ് മറ്റു രണ്ടു പ്രതികളെ കൂടി പിടികൂടിയത്.
