കുമളി : മൂന്നാറിൽ വീണ്ടും കാട്ടാന ആക്രമണം. ഓട്ടോറിക്ഷയ്ക്ക് നേരെയുണ്ടായ ആക്രമണത്തിൽ ഒരാൾ കൊല്ലപ്പെട്ടു. കാട്ടാനയുടെ ആക്രമണത്തില്‍ ഒട്ടോറിക്ഷ ഡ്രൈവർ കൊല്ലപ്പെട്ടത്തില്‍ പ്രതിഷേധിച്ച്‌ മൂന്നാറില്‍ ഇന്ന് ഹർത്താല്‍. കെഡിഎച്ച്‌ വില്ലേജ് പരിധിയില്‍ എല്‍ഡിഎഫ് പ്രഖ്യാപിച്ച ഹർത്താല്‍ ആരംഭിച്ചു. വൈകിട്ട് ആറു വരെയാണ് ഹർത്താല്‍. മൂന്നാറില്‍ ഇന്ന് റോഡ് ഉപരോധം ഉള്‍പ്പെടെയുള്ള പ്രതിഷേധ പരിപാടികള്‍ കോണ്‍ഗ്രസും ആസൂത്രണം ചെയ്യുന്നുണ്ട്. മൂന്ന് പേർക്ക് പരുക്ക്. കന്നിമല എസ്റ്റേറ്റിലാണ് സംഭവം. കന്നിമല എസ്റ്റേറ്റ് സ്വദേശി മണിയാണ് കാട്ടാന ആക്രമണത്തിൽ കൊല്ലപ്പെട്ടത്. മണിയാണ് ഓട്ടോറിക്ഷ ഓടിച്ചിരുന്നത്. ഇന്നലെ രാത്രി 9.30 ഓടെയായിരുന്നു സംഭവം. കന്നിമല എസ്‌റേററ്റ് ഫാക്ടറിയില്‍ ജോലി കഴിഞ്ഞ് തൊഴിലാളികളുമായി വീട്ടിലേക്ക് മടങ്ങവേ ആയിരുന്നു കാട്ടാനയുടെ ആക്രമണം. ഓട്ടോയെ കുത്തി മറിച്ചിട്ട ഒറ്റയാന്‍ ഓട്ടോയില്‍ നിന്നും തെറിച്ചു വീണ മണിയെ തുമ്പിക്കൈയ്യില്‍ ചുഴറ്റിയെടുത്ത് എറിയുകയായിന്നു. തെറിച്ചു വീണ മണിയുടെ തലയ്ക്ക് ഗുരുതര പരിക്കേല്‍ക്കുകയും തല്‍ക്ഷണം മരണം സംഭവിക്കുകയുമായിരുന്നു.
മണിയെ കൂടാതെ നാലു പേരാണ് ഓട്ടോയില്‍ ഉണ്ടായിരുന്നത്. യാത്രക്കാരില്‍ എസക്കി രാജ (45) റെജിനാ (39) എന്നിവരുടെ പരുക്ക് ഗുരുതരമാണ്. ഇവരെ മൂന്നാറിലെ ഹൈറേഞ്ച് ആശുപത്രിയില്‍ പ്രവേശിപ്പിച്ചു. കഴിഞ്ഞ ജനുവരി 23 ന് ഗുണ്ടുമല എസ്റ്റേറ്റില്‍ തമിഴ്‌നാട് സ്വദേശിയെ ചവിട്ടി കൊന്ന ആന തന്നെയാണ് ആക്രമണം നടത്തിയതെന്നാണ് നാട്ടുകാര്‍ പറയുന്നത്. ആഴ്ചകള്‍ക്കു മുമ്പ് വയനാട്ടിലുണ്ടായ കാട്ടാന ആക്രമണത്തില്‍ മൂന്നു പേര്‍ മരിച്ചിരുന്നു.
