കോട്ടയം: നാലു കിലോ കഞ്ചാവുമായി നാട്ടകം സ്വദേശിയെ ചങ്ങനാശേരി എക്‌സൈസ് സംഘം പിടികൂടി. നാട്ടകം പോളച്ചിറ ഞാവക്കാട് ചിറയിൽ വീട്ടിൽ ഗിരീഷ് (28)നെയാണ് അറസ്റ്റ് ചെയ്തു. ഇയാൾ കഞ്ചാവ് കടത്തിക്കൊണ്ടു വരുന്നതിന് ഉപയോഗിച്ച സ്‌കൂട്ടറും എക്‌സൈസ് സംഘം പിടിച്ചെടുത്തു. ചങ്ങനാശേരി എക്‌സൈസ് ഇൻസ്‌പെക്ടർ ടി.എസ് പ്രമോദിന്റെ നേതൃത്വത്തിലാണ് പരിശോധന നടത്തിയത്. ബുധനാഴ്ച രാത്ി പത്ത് മണിയോടെയായിരുന്നു സംഭവം. കുറിച്ചി ഭാഗത്ത് വ്യാപകമായ രീതിയിൽ കഞ്ചാവ് കച്ചവടം നടക്കുന്നതായി എക്‌സൈസ് സംഘത്തിന് വിവരം ലഭിച്ചിരുന്നു. ഇതേ തുടർന്ന്, എക്‌സൈസ് സംഘം പരിശോധന ശക്തമാക്കി. ഇതിനിടെയാണ് കുറിച്ചി ഭാഗത്ത് സംശയാസ്പദമായ രീതിയിൽ കണ്ടെത്തിയ ഗിരീഷിനെ എക്‌സൈസ് സംഘം ചോദ്യം ചെയ്തത്. തുടർന്നാണ്, ഇയാളുടെ പക്കൽ നിന്നും കഞ്ചാവ് കണ്ടെത്തിയത്. റെയിഡിൽ അസി.എക്‌സൈസ് ഇൻസ്‌പെക്ടർ ടി.എസ് സുരേഷ്, സിവിൽ എക്‌സൈസ് ഓഫിസർമാരായ പ്രവീൺകുമാർ എ.ജി, അമൽദേവ് ഡി., വുമൺസിവിൽ എക്‌സൈസ് ഓഫിസർ നിത്യ വി.മുരളി, ഡ്രൈവർ മനീഷ് എന്നിവർ നേതൃത്വം നൽകി.
