ചാന്ദ്ര രഹസ്യം തേടി നാസയുടെ നോവ-സി’ ; ചാന്ദ്രദൗത്യത്തിന് ഇന്ന് തുടക്കമാകും 

ന്യൂസ് ഡെസ്ക് : സ്വകാര്യ കമ്പനിയുമായി സഹകരിച്ചുള്ള നാസയുടെ മറ്റൊരു ചാന്ദ്രദൗത്യത്തിന് ഇന്ന് തുടക്കമാകും. ഇന്റ്യൂറ്റീവ് മെഷീൻസ് കമ്പനിയുമായി ചേർന്നുള്ള ‘നോവ-സി’ ലാൻഡർ ബുധനാഴ്ച ഫ്ലോറിഡയിലെ കെന്നഡി സ്പേസ് സെന്ററില്‍നിന്ന് കുതിച്ചുയരും.സ്പേസ് എക്സിന്റെ ഫാല്‍ക്കണ്‍ റോക്കറ്റാണ് ലാൻഡറിനെ ചന്ദ്രനിലെത്തിക്കുക. ഫെബ്രുവരി 22ന് ചന്ദ്രോപരിതലത്തില്‍ സോഫ്റ്റ് ലാൻഡിങ് നടത്തുമെന്നാണ് പ്രതീക്ഷിക്കുന്നത്. 

ചാന്ദ്രയാൻ 3 ഇറങ്ങിയ ചന്ദ്രന്റെ ദക്ഷിണധ്രുവത്തില്‍തന്നെയാകും നോവ-സിയും ഇറങ്ങുക. ആറ് പേ ലോഡുകളാണ് ഇതില്‍ ഘടിപ്പിച്ചിരിക്കുന്നത്. നോവ-സിയുടെ രണ്ട് ദൗത്യങ്ങള്‍ക്കൂടി ഈ വർഷം നടക്കും. അതിലെ വാഹനങ്ങള്‍ക്ക് സുരക്ഷിതമായി ചന്ദ്രനിലിറങ്ങാനുള്ള വഴികാട്ടുകയാണ് നോവ-സി. 

2019ല്‍, ഒൻപത് സ്വകാര്യ കമ്പനികളുമായി ചാന്ദ്രദൗത്യത്തിന് നാസ കരാർ ഒപ്പിട്ടിരുന്നു. ഇതില്‍ രണ്ടാമത്തെ കമ്പനിയാണ് ഇന്റ്യൂറ്റീവ് മെഷീൻസ്. അസ്ട്രോബോട്ടിക് ടെക്നോളജി എന്ന കമ്പനിയുമായി ചേർന്ന് കഴിഞ്ഞമാസം നാസ നടത്തിയ പെരിഗ്രീൻ ദൗത്യം പരാജയപ്പെട്ടിരുന്നു. ഇത് നാസയുടെ മനുഷ്യനെയും വഹിച്ചുള്ള ചാന്ദ്രയാത്ര നീട്ടിവെക്കാൻ കാരണമായി.