ന്യൂഡൽഹി : ഇന്ത്യയില്‍ വന്‍ നിക്ഷേപവുമായി ദുബായ് സര്‍ക്കാര്‍ ഉടമസ്ഥതയിലുള്ള തുറമുഖ രംഗത്തെ ഭീമനായ ഡിപി വേള്‍ഡ്. ഇന്ത്യയിലെ ഗുജറാത്ത് സംസ്ഥാനത്തെ കാണ്ട്‌ല തുറമുഖത്ത് ഒരു പുതിയ കണ്ടെയ്‌നര്‍ ടെര്‍മിനല്‍ നിര്‍മ്മിക്കാൻ 510 മില്യണ്‍ ഡോളര്‍ നിക്ഷേപിക്കുമെന്നാണ് കമ്ബനി കഴിഞ്ഞ ദിവസം പ്രഖ്യാപിച്ചത്.അതായത് 4200 കോടിയിലേറെ രൂപയുടെ നിക്ഷപമാണ് ദുബായില്‍ നിന്ന് വരുന്നതെന്ന് സാരം.
“പുതിയ ടെര്‍മിനല്‍ വടക്കൻ, പടിഞ്ഞാറൻ, മധ്യ ഇന്ത്യയെ ആഗോള വിപണികളുമായി ബന്ധിപ്പിച്ച്‌ വ്യാപാര അവസരങ്ങള്‍ പുതുക്കും,” ദീൻദയാല്‍ തുറമുഖ അതോറിറ്റിയുമായി കരാര്‍ ഒപ്പിട്ട ശേഷം ഡിപി വേള്‍ഡ് ചെയര്‍മാനും സിഇഒയുമായ സുല്‍ത്താൻ അഹമ്മദ് ബിൻ സുലായം വ്യക്തമാക്കി.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
2027-ന്റെ തുടക്കത്തില്‍ പൂര്‍ത്തിയാകാൻ പോകുന്ന ടെര്‍മിനലിന് 8.19 ദശലക്ഷം ടിഇയു കൈകാര്യം ചെയ്യാനുള്ള ശേഷിയുണ്ടാകുമെന്നു ഡിപി വേള്‍ഡ് പ്രസ്താവനയില്‍ പറയുന്നു. പുതിയ ടെര്‍മിനല്‍ ഇന്ത്യയിലെ കണ്ടെയ്‌നര്‍ ട്രാഫിക് വര്‍ദ്ധിപ്പിക്കുമെന്നും ലോജിസ്റ്റിക്‌സ് ചെലവ് കുറയ്ക്കുമെന്നും മറ്റ് കമ്ബനി ഉദ്യോഗസ്ഥരും കൂട്ടിച്ചേര്‍ത്തു.
ബില്‍ഡ്-ഓപ്പറേറ്റ്-ട്രാൻസ്ഫര്‍ (ബിഒടി) അടിസ്ഥാനത്തില്‍ ടെര്‍മിനല്‍ വികസിപ്പിക്കുന്നതിനുള്ള ഡിപി വേള്‍ഡും സര്‍ക്കാര്‍ ഉടമസ്ഥതയിലുള്ള നാഷണല്‍ ഇൻവെസ്റ്റ്‌മെന്റ് ആൻഡ് ഇൻഫ്രാസ്ട്രക്ചര്‍ ഫണ്ടും തമ്മിലുള്ള സംയുക്ത സംരംഭമായ ഹിന്ദുസ്ഥാൻ ഇൻഫ്രാലോഗ് പ്രൈവറ്റ് ലിമിറ്റഡിന്റെ പദ്ധതിക്ക് ജൂലൈ 29-ന് ഇന്ത്യൻ സര്‍ക്കാരും അംഗീകാരം നല്‍കിയിരുന്നു.
‘സ്പെഷ്യലൈസ്ഡ് മള്‍ട്ടിപ്രൊഡക്‌ട്, ടെമ്ബറേച്ചര്‍ കണ്‍ട്രോള്‍ഡ് വെയര്‍ഹൗസുകള്‍, അത്യാധുനിക ഡിജിറ്റല്‍ സുരക്ഷാ സംവിധാനങ്ങളുള്ള കണ്ടെയ്‌നര്‍ യാര്‍ഡ് തുടങ്ങിയ അത്യാധുനിക ഇൻഫ്രാസ്ട്രക്ചറുകളോടെയാണ് ഈ സൗകര്യം സജ്ജീകരിച്ചിരിക്കുന്നത്’ പത്രക്കുറിപ്പില്‍ പറയുന്നു. ഡിപി വേള്‍ഡ് ഇതിനകം തന്നെ ഇന്ത്യയിലെ നിരവധി തുറമുഖങ്ങളില്‍ അഞ്ച് കണ്ടെയ്‌നര്‍ ടെര്‍മിനലുകള്‍ പ്രവര്‍ത്തിപ്പിക്കുന്നുണ്ട്. ഇത് രാജ്യത്തെ കണ്ടെയ്‌നര്‍ ട്രാഫിക്കിന്റെ 28 ശതമാനം വിപണി വിഹിതം കൈകാര്യം ചെയ്യുന്നു.
അതേസമയം, 2030-ഓടെ യുഎഇയുടെ ഏറ്റവും വലിയ കയറ്റുമതി കേന്ദ്രമായി ഇന്ത്യ മാറുമെന്ന് സ്റ്റാൻഡേര്‍ഡ് ചാര്‍ട്ടേഡിന്റെ റിപ്പോര്‍ട്ട് ജൂണില്‍ വെളിപ്പെടുത്തിയിരുന്നു. കിഴക്കൻ ഏഷ്യ, ആഫ്രിക്ക, പശ്ചിമേഷ്യ എന്നിവിടങ്ങളിലെ വ്യാപാര ഇടനാഴികളിലൂടെ കടന്നുപോകുന്ന ചരക്കുകളുടെ മൂല്യം 14.4 ട്രില്യണ്‍ ഡോളറായി വളരുമെന്ന് പ്രതീക്ഷിക്കുന്നതായി റിപ്പോര്‍ട്ട് എടുത്തുകാട്ടി. 2030-ഓടെ ആഗോള വ്യാപാരത്തിന്റെ 44 ശതമാനം വരുമിത്.
ജൂണ്‍ 29-ന്, പ്രമുഖ എമിറാത്തി പോര്‍ട്ട് ഓപ്പറേറ്ററായ എഡി പോര്‍ട്ട്സ് ഗ്രൂപ്പും പാകിസ്ഥാനിലെ കറാച്ചി പോര്‍ട്ട് ട്രസ്റ്റും (കെപിടി) തമ്മിലുള്ള നിക്ഷേപ ഇടപാടിന് അന്തിമരൂപം നല്‍കി യുഎഇ പാക്കിസ്ഥാനിലെ തുറമുഖ ബിസിനസ്സ് വിപുലീകരിക്കുകയും ചെയ്തിരുന്നു.
പശ്ചിമേഷ്യൻ ശക്തികളായ സൗദി അറേബ്യയും ഇറാനും ഉള്‍പ്പെടെ ഈ ആഴ്ച മറ്റ് അഞ്ച് രാജ്യങ്ങളുമായി ബ്രിക്‌സ് ഗ്രൂപ്പിലെ രാജ്യങ്ങളുടെ സ്വീകാര്യതയ്‌ക്കൊപ്പം വ്യാപാര ശേഷി വിപുലീകരിക്കാനുള്ള യുഎഇയുടെ ശ്രമവും തുടര്‍ന്ന് വരികയാണ്. എമിറാത്തി പ്രസിഡന്റ് മുഹമ്മദ് ബിൻ സായിദ് (MbZ) സോഷ്യല്‍ മീഡിയയിലൂടെ രാജ്യത്തെ പ്രതിനിധീകരിച്ച്‌ ബ്രിക്സിലേക്കുള്ള ക്ഷണം ഔദ്യോഗികമായി സ്വീകരിക്കുകയായിരുന്നു.
