കുമരകത്ത് പറ നിറയ്ക്കുന്നതിനിടെ കതിന പൊട്ടിച്ചു; വെടിക്കെട്ടുകാരന് പൊള്ളലേറ്റു

കോട്ടയം: കുമരകത്ത് പറ സ്വീകരിക്കുന്ന ചടങ്ങിനിടെ കതിന പൊട്ടിക്കുമ്പോൾ, വെടിക്കെട്ടുകാരന് പൊള്ളലേറ്റു. കോട്ടയം കുമരകം ചക്രംപടി മൂലേപ്പാടത്ത് ഇന്ന് രാവിലെ എട്ടരയോടെയാണ് സംഭവം. കുമരകം പള്ളിച്ചിറ സ്വദേശി സാബുവിനാണ് പരിക്കേറ്റത്.

40% ത്തോളം പൊള്ളലേറ്റതായാണ് വിവരം. കുമരകത്തെ ക്ഷേത്രത്തിലേക്ക് ചക്രം പടിയിലുള്ള ഭവനത്തിൽ നിന്ന് നെൽപറ സ്വീകരിക്കുമ്പോൾ ആചാരപരമായി കതിന പൊട്ടിക്കുന്നതിനിടെയാണ് അപകടമുണ്ടായത്.

കതിനയിൽ നിന്നുള്ള തീപ്പൊരി സാബുവിന്റെ കൈവശമിരുന്ന വെടിമരുന്ന് നിറച്ചിരുന്ന ബക്കറ്റിലേക്ക് പടർന്നാണ് അപകടം. ഉടൻ തന്നെ സമീപവാസികളുടെ നേതൃത്വത്തിൽ രക്ഷാപ്രവർത്തനം നടത്തി കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.