കുന്ദമംഗലം: കോഴിക്കോട് വീണ്ടും മയക്കുമരുന്ന് വേട്ട. കുന്ദമംഗലത്തെ സ്വകാര്യ ലോഡ്ജ് മുറിയില്‍ നിന്നും ന്യൂജെൻ മയക്കുമരുന്നായ എംഡിഎംഎയുമായി രണ്ട് യുവാക്കള്‍ പിടിയില്‍. പാലക്കോട്ട് വയല്‍ ഐ.എം.ജി താഴം അതുല്‍ പി.പി, മുണ്ടിക്കല്‍ താഴം സ്വദേശി ഷാഹുല്‍ഹമീദ് പി കെ എന്നിവരെയാണ് കോഴിക്കോട് സിറ്റി ഡാൻസാഫ് സ്കോഡും കുന്ദമംഗലം പൊലീസും ചേർന്ന് പിടികൂടിയത്. കുന്ദമംഗലം ടൌണിലെ കെജിഎം കോംപ്ലക്സിലെ ആറാം നമ്പർ മുറിയില്‍ നിന്നാണ് പ്രതികള്‍ പിടിയിലായത്.
രഹസ്യ വിവരത്തിന്‍റെ അടിസ്ഥാനത്തില്‍ നടത്തിയ പരിശോധനയിലാണ് യുവാക്കള്‍ കുടുങ്ങിയത്. യുവാക്കള്‍ ലോഡ്ജില്‍ മുറിയെടുത്ത് കോളേജ് വിദ്യാർത്ഥികള്‍ക്കും, ടർഫ്, മാളുകള്‍ എന്നിവ കേന്ദ്രീകരിച്ച്‌ മയക്കുമരുന്ന് ചില്ലറ വില്പന നടത്തുന്നു എന്ന് ഡാൻസാഫ് സംഘത്തിന് രഹസ്യ വിവരം ലഭിച്ചിരുന്നു. ഇവരില്‍ നിന്നും 28 ഗ്രാമോളം എംഡിഎംഎ പിടിച്ചെടുത്തതായി പൊലീസ് പറഞ്ഞു. ബെംഗ്ലൂരില്‍ നിന്നും എംഡിഎംഎ എത്തിച്ച്‌ ചില്ലറ വില്പന നടത്തുന്നവരില്‍ പ്രധാനികളാണ് ഇരുവരും. പലതവണയായി ഡാൻസാഫ് സംഘത്തിനെ വെട്ടിച്ചു കടന്നു കളഞ്ഞ പ്രതികളെ, ഇത്തവണ വളരെ തന്ത്രപരമായാണ് പൊലീസ് വലയിലാക്കിയത്.
പിടിച്ചെടുത്ത മയക്കുമരുന്ന് ബെംഗളൂരുവില്‍ നിന്നുമാണ് എത്തിച്ചതെന്നും, യുവാക്കള്‍ ലഹരിവില്‍പ്പന സംഘത്തിലെ സ്ഥിരം കണ്ണികളാണെന്നും പൊലീസ് പറഞ്ഞു.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
ഇതിനിടെ കൊച്ചിയില്‍ കാക്കനാട്ട് ബൈക്കില്‍ കടത്തിക്കൊണ്ട് വന്ന 9.29 ഗ്രാം എംഡിഎംയുമായി ഒരാളെ എക്സൈസ് അറസ്റ്റ് ചെയ്തു. 31 കാരനായ അൻസർ ആണ് പിടിയിലായത്. എറണാകുളം എക്സൈസ് എൻഫോഴ്സ്മെന്‍റ് & ആന്‍റി നർകോട്ടിക് സ്പെഷ്യല്‍ സ്‌ക്വാഡിലെ എക്സൈസ് ഇൻസ്പെക്ടർ കെ.പി.പ്രമോദും പാർട്ടിയും ചേർന്നാണ് മയക്കുമരുന്ന് പിടിച്ചെടുത്തത്.
