വാഷിങ്ങ്ടൺ : ഏകദേശം 1,000 അടി ഉയരമുള്ള ‘മെഗാ സുനാമി’ അമേരിക്കയുടെ വലിയൊരു ഭാഗം തന്നെ നശിപ്പിക്കുമെന്ന് മുന്നറിയിപ്പ് നല്‍കി ശാസ്‌ത്രജ്ഞർ.കാസ്കാഡിയ സബ്ഡക്ഷൻ സോണില്‍ ശക്തമായ ഒരു ഭൂകമ്ബം ഉണ്ടാകുന്നതോടെ ഇത് സംഭവിക്കുമെന്നാണ് അവർ പറയുന്നത്. ‘പ്രൊസീഡിംഗ്‌സ് ഓഫ് ദി നാഷണല്‍ അക്കാഡമി ഓഫ് സയൻസസില്‍’ പ്രസിദ്ധീകരിച്ച വിർജീനിയ ടെക്കിലെ ഗവേഷകർ നടത്തിയ പുതിയ പഠനത്തിലാണ് ഈ മുന്നറിയിപ്പ് നല്‍കിയിരിക്കുന്നത്. ഭൂകമ്ബം മൂലം അമേരിക്കയുടെ തീരപ്രദേശത്തിന്റെ ചില ഭാഗങ്ങള്‍ 6.5 അടി വരെ താഴ്ന്നുപോകുമെന്നും ഇത് സുനാമിയെ കൂടുതല്‍ വിനാശകാരിയാക്കുമെന്നും പഠനം പറയുന്നു. എന്താണ് മെഗാ സുനാമി. ഇത് അമേരിക്കയുടെ ഏതൊക്കെ മേഖലകളെയാണ് ബാധിക്കുന്നത്. അപകടസാദ്ധ്യത എന്തെല്ലാമാണ് എന്ന് വിശദമായറിയാം.
എന്താണ് മെഗാ സുനാമി?
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
സാധാരണ സുനാമിയില്‍ നിന്ന് വളരെ വ്യത്യസ്‌തമാണ് മെഗാ സുനാമി. നൂറുകണക്കിന് അടി ഉയരത്തിലുള്ള തിരമാലകളാണ് മെഗാ സുനാമി സൃഷ്‌ടിക്കുന്നത്. ശക്തമായ ഭൂകമ്ബങ്ങള്‍, മണ്ണിടിച്ചില്‍, അഗ്നിപർവത സ്‌ഫോടനങ്ങള്‍ അല്ലെങ്കില്‍ ഉല്‍ക്കാവർഷങ്ങള്‍ പോലെ വെള്ളത്തിനടിയില്‍ സംഭവിക്കുന്ന പ്രധാന സംഭവങ്ങള്‍ മൂലമാണ് ഇവ ഉണ്ടാകുന്നത്. സാധാരണ സുനാമിയില്‍ നിന്ന് വ്യത്യസ്‌തമായി മൈലുകള്‍ താണ്ടി ഉള്‍നാടുകളില്‍ പോലും ഇതിന്റെ പ്രത്യാഘാതങ്ങള്‍ എത്തും. തീരദേശം മാത്രമല്ല ഉള്‍ഗ്രാമങ്ങളെ പോലും ഇവ നശിപ്പിക്കും. ആളുകള്‍ക്ക് രക്ഷപ്പെടാൻ പോലും അധിക സമയം കിട്ടില്ല. അത്രയും വേഗത്തിലാകും ഈ തിരമാലകള്‍ സഞ്ചരിക്കുക. അപൂർവമാണെങ്കിലും ഇതിന് മുമ്ബും ഇത്തരത്തിലുള്ള സംഭവങ്ങള്‍ നടന്നിട്ടുണ്ട്. ജനവാസമേഖലയില്‍ ഇവ പതിച്ചാല്‍ വൻ അപകടങ്ങളാകും വരുത്തുക.
അടുത്ത 50 വർഷത്തിനുള്ളില്‍ അമേരിക്കൻ മേഖലയില്‍ 8.0 തീവ്രതയുള്ള ഭൂകമ്ബത്തിന് 15 ശതമാനം സാദ്ധ്യതയുണ്ടെന്നാണ് പ്രൊസീഡിംഗ്‌സ് ഓഫ് ദി നാഷണല്‍ അക്കാഡമി ഓഫ് സയൻസസില്‍ പ്രസിദ്ധീകരിച്ച വിർജീനിയ ടെക്കിലെ ഭൗമശാസ്ത്രജ്ഞരുടെ പുതിയ പഠനം പറയുന്നത്. ഇത്തരമൊരു ശക്തമായ ഭൂകമ്ബമുണ്ടായാല്‍ മെഗാ സുനാമി ഉണ്ടാകും. ഇതോടെ തീരപ്രദേശങ്ങള്‍ 6.5 അടി വരെ മുങ്ങിയേക്കാം. കൂടാതെ സിയാറ്റില്‍, ഒറിഗോണ്‍, പോർട്ട്‌ലാൻഡ് തുടങ്ങിയ പ്രധാന നഗരങ്ങളും ഒലിച്ചുപോകുമെന്നാണ് ശാസ്‌ത്രജ്ഞർ പറയുന്നത്.
വടക്കൻ വാൻകൂവർ ദ്വീപില്‍ നിന്ന് കാലിഫോർണിയയിലെ കേപ് മെൻഡോസിനോ വരെ നീളുന്ന ഒരു ഫോള്‍ട്ട് ലൈനായ കാസ്‌കേഡിയ സബ്ഡക്ഷൻ സോണിലാണ് ഭൂകമ്ബം ഉണ്ടാകുന്നതെങ്കില്‍, അലാസ്ക, ഹവായ്, അമേരിക്കയുടെ വെസ്റ്റ് കോസ്റ്റിന്റെ ചില ഭാഗങ്ങള്‍ എന്നിവ അപകടത്തില്‍പ്പെടും. ഇവ പൂർണമായും മുങ്ങിപ്പോകാൻ സാദ്ധ്യതയുണ്ട്. മെഗാ സുനാമി കാരണമുണ്ടാകുന്ന തിരമാലകള്‍ 1000 അടി വരെ ഉയരാം. ഇത് ദശലക്ഷക്കണക്കിന് ജനങ്ങളുടെ ജീവൻ അപകടത്തിലാക്കും.
സാധാരണ കാലാവസ്ഥാ വ്യതിയാനങ്ങള്‍ മൂലമുണ്ടാകുന്ന മാറ്റങ്ങളെ പോലെ ജനങ്ങള്‍ക്ക് സ്ഥലത്ത് നിന്നും മാറാനോ തയ്യാറെടുപ്പുകള്‍ നടത്താനോ ഉള്ള സമയം പോലും ലഭിക്കില്ല. മിനിട്ടുകള്‍ക്കുള്ളില്‍ മൈലുകളോളം സഞ്ചരിക്കാൻ ഈ തിരമാലകള്‍ക്കാകുമെന്നും ശാസ്‌ത്രജ്ഞർ പറഞ്ഞു. കൂടാതെ ഈ ആഘാതങ്ങളില്‍ നിന്നെല്ലാമുള്ള വീണ്ടെടുക്കലിന് ഏറെ സമയം വേണ്ടിവരുമെന്നും പഠനത്തിന്റെ മുഖ്യ രചയിതാവും വിർജീനിയ ടെക്കിന്റെ ജിയോസയൻസസ് വകുപ്പിലെ അസിസ്റ്റന്റ് പ്രൊഫസറുമായ ടിന ഡ്യൂറ ഒരു പ്രസ്താവനയില്‍ പറഞ്ഞു. തെക്കൻ വാഷിംഗ്ടണ്‍, വടക്കൻ ഒറിഗോണ്‍, വടക്കൻ കാലിഫോർണിയ എന്നിവിടങ്ങളിലാണ് ഏറ്റവുമധികം നാശനഷ്‌ടം ഉണ്ടാകാൻ പോകുന്നതെന്ന് പഠനത്തില്‍ കണ്ടെത്തി.
വടക്കേ അമേരിക്കയിലെ ഏറ്റവും സജീവമായ ഭൂകമ്ബ മേഖലകളില്‍ ഒന്നാണ് കാസ്കാഡിയ സബ്ഡക്ഷൻ സോണ്‍. അധികം വൈകാതെ ഇവരെ വലിയൊരു ശക്തമായ ഭൂകമ്ബത്തിന് സാദ്ധ്യതയുണ്ടെന്നാണ് വിദഗ്ദ്ധർ പറയുന്നത്. വടക്കൻ കാലിഫോർണിയ മുതല്‍ ബ്രിട്ടീഷ് കൊളംബിയ വരെ ഏകദേശം 700 മൈല്‍ വ്യാപിച്ചുകിടക്കുന്ന ഈ സോണ്‍ പസഫിക് തീരത്ത് നിന്ന് ഏകദേശം 70 മുതല്‍ 100 മൈല്‍ വരെ അകലെയാണ് സ്ഥിതി ചെയ്യുന്നത്.
കഴിഞ്ഞ 10,000 വർഷത്തിനിടയില്‍ ഇവിടെ 43 ഭൂകമ്ബങ്ങള്‍ രേഖപ്പെടുത്തിയിട്ടുണ്ട്. 1700 ജനുവരി 26നാണ് ഇവിടെ അവസാനമായി ഭൂകമ്ബം ഉണ്ടായത്. ഏകദേശം 9.0 തീവ്രത രേഖപ്പെടുത്തി. സുനാമി രൂപപ്പെട്ട് തീരപ്രദേശം മുങ്ങുകയും ചെയ്‌തുവെന്ന് ഒറിഗോണ്‍ ഡിപ്പാർട്ട്മെന്റ് ഓഫ് എമർജൻസി മാനേജ്മെന്റ് അറിയിച്ചു. ഈ പ്രദേശത്ത് ഇനിയൊരു ഭൂകമ്ബം ഉണ്ടായാല്‍ അത് അഞ്ച് മുതല്‍ ഏഴ് മിനിട്ട് വരെ നീണ്ടുനില്‍ക്കുമെന്നാണ് കണ്ടെത്തല്‍. അതിനാല്‍, മെഗാ സുനാമിയില്‍ ഈ പ്രദേശം പൂർണമായും നശിക്കാൻ സാദ്ധ്യതയേറെയാണ്.