കൊച്ചി : പ്രധാനമന്ത്രി നരേന്ദ്രമോദി കൊച്ചിയിലെത്തുന്നതിന് തൊട്ടുമുമ്പ് അദ്ദേഹം പങ്കെടുക്കുന്ന യുവം-23 പരിപാടി നടക്കുന്ന സേക്രഡ് ഹാര്‍ട്ട് കോളേജിന് മുന്നില്‍ പ്രതിഷേധം. ‘മോദി ഗോബാക്ക്’ വിളികളുമായി പ്രതിഷേധിച്ച യൂത്ത് കോണ്‍ഗ്രസ് പ്രവര്‍ത്തകനെ പോലീസ് കസ്റ്റഡിയിലെടുത്തു. പ്രധാനമന്ത്രി മോദിയുടെ സന്ദര്‍ശനത്തിന്റെ പശ്ചാത്തലത്തില്‍ നഗരം കനത്ത പോലീസ് വലയത്തിലായിരിക്കെയാണ് പ്രതിഷേധവുമായി യൂത്ത് കോണ്‍ഗ്രസ് പ്രവര്‍ത്തകന്‍ രംഗത്തെത്തിയത്.
രണ്ടുദിവസത്തെ സന്ദര്‍ശനത്തിനായി അഞ്ചുമണിയോടെ പ്രധാനമന്ത്രി കേരളത്തിലെത്തും. നാവികസേന വിമാനത്താവളത്തില്‍ പ്രത്യേക വിമാനത്തില്‍ വന്നിറങ്ങുന്ന അദ്ദേഹം, തേവര സേക്രഡ്ഹാര്‍ട്ട് കോളേജിലേക്ക് പോകും. പെരുമാന്നൂര്‍ ജങ്ഷന്‍മുതല്‍ തേവര കോളേജുവരെ റോഡ്ഷോയായാണ് യാത്ര. കോളേജ് ഗ്രൗണ്ടില്‍ യുവം-23 പരിപാടിയില്‍ അദ്ദേഹം പങ്കെടുക്കും. നാലേമുക്കാലോടെ പരിപാടി ആരംഭിക്കും. അനില്‍ ആന്റണി, വിജയ് യേശുദാസ്, ക്രിക്കറ്റ് താരം രവീന്ദ്ര ജഡേജ, സിനിമാതാരങ്ങളായ യഷ്, ഋഷഭ് ഷെട്ടി തുടങ്ങിയവരും സംഗമത്തില്‍ പങ്കെടുക്കും.
