കോട്ടയം: നഗരമധ്യത്തിൽ ടിബി റോഡിൽ ഇതര സംസ്ഥാന തൊഴിലാളികളുടെ തമ്മിലടി. മൂക്കിനും തലയ്ക്കും പരിക്കേറ്റ മൂന്ന് ഇതരസംസ്ഥാന തൊഴിലാളികളെ കോട്ടയം വെസ്റ്റ് പൊലീസ് എത്തിയാണ് ആശുപത്രിയിൽ എത്തിച്ചത്. അരമണിക്കൂറോളം ഇവിടെ വലിയ സംഘർഷാവസ്ഥയായിരുന്നു. നഗരമധ്യത്തിൽ ഇന്ത്യൻ കോഫി ഹൗസിനു എതിർവശത്തെ പെട്ടികടയിലായിരുന്നു അക്രമ സംഭവങ്ങളുടെ തുടക്കം. പെട്ടിക്കടയിൽ വച്ച് ഇതര സംസ്ഥാന തൊഴിലാളികൾ തമ്മിൽ ആദ്യം വാക്കേറ്റവും പിന്നീട് കയ്യാങ്കളിയും ഉണ്ടാകുകയായിരുന്നു. പിടിച്ച് മാറ്റാൻ എത്തിയവരെയും അക്രമി സംഘം ആക്രമിച്ചു. പത്തോളം വരുന്ന ഇതര സംസ്ഥാന തൊഴിലാളികളാണ് ഇവിടെ വച്ച് ഏറ്റുമുട്ടിയത്. സംഘർഷം രൂക്ഷമായതോടെ നാട്ടുകാർ വിഷയത്തിൽ ഇടപെട്ടു. പിടിച്ചു മാറ്റാൻ ചെന്നവരെയും ഇവർ ആക്രമിച്ചതോടെ നാട്ടുകാർ വിവരം പൊലീസിനെ അറിയിച്ചു. തുടർന്ന്, പൊലീസ് സംഘം സ്ഥലത്ത് എത്തിയപ്പോഴേയ്ക്കും അക്രമികൾ ഓടിരക്ഷപെട്ടു. സംഭവത്തിൽ പരിക്കേറ്റ മൂന്നു പേരെ പൊലീസ് ആശുപത്രിയിൽ എത്തിച്ചു.
