കോട്ടയം: പാക്കിലും പരിസര പ്രദേശത്തും തെരുവുനായ ശല്യം അതിരൂക്ഷമാകുന്നതായി റിപ്പോർട്ട്. പാക്കിൽ, ചെട്ടിക്കുന്ന് , കടുവാക്കുളം, പതിനഞ്ചിൽപ്പടി, ലക്ഷം വീട് ഭാഗങ്ങളിലാണ് തെരുവനായ്ക്കൾ സാധാരണക്കാർക്ക് ഭീഷണിയാകുന്നത്. പ്രദേശത്ത് വീടുകളിൽ കൂട്ടിൽ കിടന്നിരുന്ന 40 ഓളം കോഴികളെയാണ് നായ്ക്കൾ ആക്രമിച്ചു കൊന്നു തിന്നത്. പ്രദേശത്തെ ഇരുചക്ര വാഹനയാത്രക്കാർക്ക് രാത്രി കാലത്ത് നായകൾ ഭീഷണി സൃഷ്ടിക്കുന്നുണ്ട്. ഇരുചക്ര വാഹനങ്ങളിൽ സാധാരണക്കാരായ ആളുകൾ വാഹനം ഓടിച്ചെത്തുമ്പോൾ നായകൾ കുരച്ചു ചാടുന്നത് സാധാരണക്കാരായ ഇരുചക്ര വാഹന യാത്രക്കാരെ പലപ്പോഴും അപകട ഭീതിയിലാക്കിയിട്ടുണ്ട്. പകൽ സമയങ്ങളിൽ റോഡുകളിൽ കാണാത്ത നായ്ക്കൾ രാത്രിയിലാണ് ശല്യവുമായി ഇറങ്ങുന്നത്. പ്രദേശത്തെ ആളുകൾക്ക് വലിയ ബുദ്ധിമുട്ടാണ് ഈ നായ്ക്കൾ മൂലം ഉണ്ടാകുന്നത്. അടിയന്തരമായി വിഷയത്തിൽ അധികൃതർ ഇടപെടണമെന്നാണ് നാട്ടുകാരുടെ ആവശ്യം.
