കോട്ടയം എം.സി റോഡിൽ നാഗമ്പടത്ത് ബുള്ളറ്റ് അപകടത്തിൽപ്പെട്ട് യുവാവ് മരിച്ചു; മരിച്ചത് കുമാരനല്ലൂരിലെ ലൂമിനസ് ഇൻവർട്ടർ ഷോറൂം ഉടമയായ ചങ്ങനാശേരി സ്വദേശി

നാഗമ്പടത്തു നിന്നും
ജാഗ്രതാ ന്യൂസ്
പ്രത്യേക ലേഖകൻ
കോട്ടയം: എം.സി റോഡിൽ നാഗമ്പടത്ത് ബുള്ളറ്റ് മിനി വാനിൽ ഇടിച്ച് യുവാവ് മരിച്ചു. കുമാരനല്ലൂരിൽ ലൂമിനസ് ഇൻവെർട്ടർ സ്ഥാപനം നടത്തുന്ന ചങ്ങനാശേരി സ്വദേശിയായ റോബിൻ മാത്യു (33)ആണ് മരിച്ചത്. വ്യാഴാഴ്ച ഉച്ചയ്ക്ക് ഒരു മണിയോടെ നാഗമ്പടം ക്ഷേത്രത്തിന്റെ കമാനത്തിനു മുന്നിലെ സ്ഥലത്തായിരുന്നു അപകടം.

കുമാരനല്ലൂരിൽ നിന്നും നഗരത്തിലേയ്ക്കു വരികയായിരുന്നു റോബിൻ സഞ്ചരിച്ച ബുള്ളറ്റ്. ഈ സമയം എതിർ ദിശയിൽ നിന്നും എത്തിയ പിക്കപ്പ് വാനുമായി ഈ ബുള്ളറ്റ് ഇടിക്കുകയായിരുന്നു. ഇടിയുടെ ആഘാതത്തിൽ സാരമായി പരിക്കേറ്റ റോബിനെ ഇതുവഴി എത്തിയ മറ്റൊരു വാഹനത്തിൽ നാട്ടുകാരാണ് കോട്ടയം മെഡിക്കൽ കോളേജ് ആശുപത്രിയിൽ എത്തിച്ചത്.

ആശുപത്രിയിൽ ചികിത്സയിൽ കഴിയുന്നതിനിടെ റോബിന്റെ മരണം സംഭവിക്കുകയായിരുന്നു. സംഭവത്തിൽ ഗാന്ധിനഗർ പൊലീസ് കേസെടുത്തു. അപകടകാരണം എന്താണെന്നു വ്യക്തമായിട്ടില്ലെന്നു പൊലീസ് പറഞ്ഞു. പ്രദേശത്തെ സിസിടിവി ദൃശ്യങ്ങൾ അടക്കം ശേഖരിച്ച് പൊലീസ് അന്വേഷണം നടത്തും.