കോട്ടയം : ട്രെയിനിൽ യുവതിയെ ശല്യം ചെയ്ത കോളേജ് അധ്യാപകനെ റെയിൽവേ പോലീസ് പിടികൂടി. കോട്ടയത്തെ പ്രമുഖ കോളേജിലെ അധ്യാപകനെയാണ് യുവതിയോട് മോശമായി പെരുമാറിയതിന് പോലീസ് പിടികൂടിയത്. എറണാകുളത്ത് നിന്ന് കോട്ടയത്തേക്ക് വരുമ്പോൾ പരശുറാം എക്സ്പ്രസിലായിരുന്നു സംഭവം. ഇയാൾ യുവതിയെ കണ്ടത് മുതൽ മോശമായ രീതിയിൽ ഇടപെടൽ നടത്തിയിരുന്നു എന്ന് ഇരയായ യുവതി ജാഗ്രത ന്യൂസ് ലൈവിനോട് പറഞ്ഞു. എന്നാൽ യുവതിയ്ക്ക് പരാതിയില്ലാത്തതിനാൽ കേസെടുക്കാനാകില്ലെന്ന് റെയിൽവേ പോലീസ് അറിയിച്ചു. എന്നാൽ പരാതിപ്പെടുവാൻ താൻ തയ്യാറായിരുന്നു എന്നും പരാതി നൽകുവാൻ ശ്രമിച്ചപ്പോൾ പരാതി നൽകിയാൽ യാത്രയെ ബാധിക്കുമെന്ന് റെയിൽവേ പോലീസ് പറഞ്ഞതായും യുവതി ജാഗ്രതയോട് പ്രതികരിച്ചു. യുവതിക്ക് പരാതിയില്ലെന്ന് സ്റ്റേഷനിൽ എഴുതി നൽകിയതായി പോലീസ് പറയുന്നു. എന്നാൽ പരാതി നൽകാൻ തയ്യാറായ യുവതിയെ പോലീസുകാർ നിരുത്സാഹപ്പെടുത്തുകയായിരുന്നു എന്നാണ് ഒപ്പം ഉണ്ടായിരുന്ന യാത്രക്കാരുടെ പരാതി. എന്തായാലും കോളേജ് അധ്യാപകനെ റെയിൽവേ പോലീസ് കസ്റ്റഡിയിൽ എടുത്തിട്ടുണ്ട്.
