കോട്ടയം : വൈക്കത്ത് ട്രെയിനിൽ നിന്ന് ചാടിയ യുവാവിനെ പോലീസും നാട്ടുകാരും ചേർന്ന് രക്ഷപെടുത്തി. ബുധനാഴ്ച രാത്രിയായിരുന്നു സംഭവം. ട്രെയിനിൽ നിന്ന് ചാടിയ യുവാവിനെ പോലീസിൻ്റെ നേതൃത്വത്തിൽ കണ്ടെത്തി ആശുപത്രിയിൽ എത്തിച്ചു. കൊല്ലം ചവറ സ്വദേശി അൻസർ ഖാനാണ് ട്രെയിനിൽ നിന്നും ചാടിയത്. 6.30 ഓടെ ട്രെയിനിൽ നിന്ന് ചാടിയ ഇയാളെ യാത്രക്കാരൻ എടുത്ത വീഡിയോയുടെ സഹായത്താൽ സ്ഥലവാസിയായ ഇജാസ് സ്ഥലം തിരിച്ചറിയുകയായിരുന്നു. തുടർന്ന് പോലീസിൻ്റെ നേതൃത്വത്തിൽ നടത്തിയ തിരച്ചിലിലാണ് ഇയാളെ പൊതിക്കും വൈക്കം റോഡിനുമിടയ്ക്കുള്ള ചതുപ്പിൽ നിന്ന് കണ്ടെത്തിയത്.
യുവാവ് ട്രെയിനിൽ നിന്ന് ചാടിയ വിവരമറിഞ്ഞ് ജില്ലാ പോലീസ് മേധാവി കെ കാർത്തിക്കിൻ്റ നിർദേശപ്രകാരമാണ് പോലീസ് സ്ഥലത്തെത്തി തിരച്ചിൽ ആരംഭിച്ചത്. യുവാവിനെ റെയിൽവേ പാലത്തിനടുത്ത് നിന്നാണ് കണ്ടെത്തിയത്. വൈദ്യുതി പോസ്റ്റിൽ തലയിടിച്ച് അൻസാറിന് സാരമായി പരിക്കേറ്റിട്ടുണ്ട്. ഇയാൾക്ക് മാനസിക പ്രശ്നങ്ങൾ ഉണ്ടായിരുന്നതായി പോലീസ് പറഞ്ഞു. തുടർന്ന് വാർഡ് മെമ്പർ സജിയുടെയും ജോജിയുടെയും സഹായത്താൽ ആശുപത്രിയിൽ എത്തിച്ചു. നിലവിൽ ഇയാൾ കോട്ടയം മെഡിക്കൽ കോളേജിൽ ചികിത്സയിലാണ്. തലയോലപ്പറമ്പ് എസ്ഐ ജി സുശീലൻ , സിപിഒ അരുൺ , എച്ച് ജി ബിജു എന്നിവരുടെ നേതൃത്വത്തിലാണ് രക്ഷാപ്രവർത്തനം നടത്തിയത്.
