പൊലീസിനെ വെട്ടിച്ച് വിലങ്ങുമായി രക്ഷപെട്ട പ്രതി വന്നു കയറിയത് പൊലീസ് പുലിമടയിൽ..! 30 കിലോമീറ്റർ മാരത്തോൺ ഓടി ശീലിച്ച സിപിഒ ശശികുമാർ പുഷ്പം പോലെ പൊക്കി പ്രതിയെ അകത്താക്കി; കോട്ടയം സിജെഎം കോടതിയിൽ നിന്നും രക്ഷപെട്ട അസംസ്വദേശിയെ പൊലീസ് പിടികൂടിയത് ഇങ്ങനെ

കോട്ടയം: പൊലീസിനെ വെട്ടിച്ച് വിലങ്ങുമായി രക്ഷപെട്ട അസം സ്വദേശി അക്ഷരാർത്ഥത്തിൽ വന്നു കയറിയത് പുലിമടയിൽ…! 30 കിലോമീറ്റർ മാരത്തോൺ പുട്ടുപോലെ ഓടുന്ന, ഇപ്പോഴും പൊലീസ് ഫുട്‌ബോൾ ടീം താരമായ സിവിൽ പൊലീസ് ഓഫിസർ പി.എസ് ശശികുമാറിന്റെ വേഗത്തിനു മുന്നിലാണ് സ്ഥിരം മോഷ്്ടാവായ പ്രതി തോറ്റു പോയത്. കോട്ടയം റെയിൽവേ പൊലീസ് അറസ്റ്റ് ചെയ്ത ശേഷം സിജെഎം കോടതിയിൽ ഹാജരാക്കിയപ്പോൾ രക്ഷപെട്ട അസം സ്വദേശി ഗിൽദാർ ഹുസൈനാ(28)ണ് ശശികുമാറിന്റെ മിന്നൽ വേഗത്തിനു മുന്നിൽ തോറ്റു പോയത്.

വ്യാഴാഴ്ച ഉച്ചയ്ക്ക് 12 മണിയോടെയായിരുന്നു സംഭവം. കഴിഞ്ഞ ദിവസമാണ് ഗിൽദാർ ഹുസൈനെ റെയിൽവേ പൊലീസ് സംഘം കഞ്ചാവും മോഷ്ടിച്ചെടുത്ത മൊബൈൽ ഫോണുമായി പിടികൂടിയത്. തുടർന്ന് പൊലീസ് സംഘം ഇന്നു രാവിലെ ഇയാളെ കോട്ടയം സിജെഎം കോടതിയിൽ ഹാജരാക്കുകയായിരുന്നു. കോടതിയിൽ ഹാജരാക്കാനായി വിലങ്ങ് അഴിച്ചപ്പോഴേയ്ക്കും പ്രതി ഒറ്റ ഓട്ടം. കോടതി വളപ്പിൽ നിന്നും ഇറങ്ങി ഓടിയ പ്രതി ആദ്യം റോഡിൽ ഇറങ്ങി എത്തി.

ഈ സമയം തന്റെ മുന്നിലൂടെ ഒരാൾ ഓടിപ്പോകുന്നത് ശശികുമാർ ശ്രദ്ധിച്ചിരുന്നു. എന്നാൽ, ഇയാൾക്ക് 60 മീറ്ററോളം പിന്നിലായി പൊലീസ് ഉദ്യോഗസ്ഥർ ഓടിയെത്തിയത് കണ്ടപ്പോഴാണ് സംഭവം എന്താണെന്ന് ശശികുമാർ തിരിച്ചറിഞ്ഞത്. ഈ സമയം പ്രതി ഏതാണ്ട് 60 മീറ്ററോളം ദൂരം ശശികുമാറിനെ പിന്നിട്ടു കഴിഞ്ഞിരുന്നു. ഇതോടെ ഒട്ടും മടിച്ചു നിൽക്കാതെ ശശികുമാറും കുതിച്ചു. പത്തു മിനിറ്റ് കൊണ്ട് പ്രതിയ്‌ക്കൊപ്പം ഇദ്ദേഹവും എത്തി.

ഈ സമയം തന്നെ പ്രതി കളക്ടറേറ്റിന്റെ എതിർവശത്തെ ഇടവഴിയിലേയ്ക്ക് അതിവേഗം കുതിച്ചു. ശശികുമാറും തൊട്ടു തൊട്ടില്ല എന്ന രീതിയിൽ ഒപ്പം പാഞ്ഞു. ഈ റോഡ് അവസാനിച്ചതും പ്രതി സമീപത്തെ കുഴിയിലേയ്ക്ക് എടുത്ത് ചാടി. തെല്ലും മടിക്കാതെ ഒപ്പം ചാടിയ പൊലീസ് ഉദ്യോഗസ്ഥൻ ഇയാളെ പിടികൂടി. ഈ സമയം മറ്റ് പൊലീസ് ഉദ്യോഗസ്ഥരും സ്ഥലത്ത് എത്തി. തുടർന്ന് പ്രതിയെ കസ്റ്റഡിയിൽ എടുക്കുകയായിരുന്നു.

കഴിഞ്ഞ കുറച്ച് വർഷം മുൻപ് വരെ ശശികുമാർ 30 കിലോമീറ്റർ മുതലുള്ള മാരത്തോണുകൾ ഓടിയിരുന്നു. ഇത് കൂടാതെ ഫിറ്റ്‌നസ് കാത്തു സൂക്ഷിക്കുന്നതിലും ഇദ്ദേഹം പ്രതിജ്ഞാ ബന്ധനാണ്. പൊലീസ് ഫുട്‌ബോൾ ടീമിലെ സ്ഥിരം സാന്നിധ്യമായ ഇദ്ദേഹം വെറ്ററൻസ് മത്സരങ്ങളിലും താരമാണ്. പൊലീസ് ഉദ്യോഗസ്ഥയായ പി.എസ് സിന്ധു ആണ് ഭാര്യ. പ്ലസ് വൺ വിദ്യാർത്ഥി ആമിത് ആരോമലും, രണ്ടാം ക്ലാസ് വിദ്യാർത്ഥി അമൃത് ഇഷാനും മക്കളാണ്.