കോട്ടയം: എം.സി റോഡിൽ കാരിത്താസ് ഭാഗത്ത് ടിപ്പർ ലോറിയിടിച്ച് കാൽനടയാത്രക്കാരന് ദാരുണാന്ത്യം. 101 കവല സ്വദേശി തങ്കപ്പനാണ് ദാരുണമായി കൊല്ലപ്പെട്ടത്. ഇന്ന് ഉച്ചയ്ക്ക് രണ്ടു മണിയോടെയായിരുന്നു സംഭവം. കാരിത്താസിന് സമീപത്ത് സ്വകാര്യ ഭൂമിയിൽ നിന്നും മണ്ണെടുക്കുന്നുണ്ട്. ഈ സ്ഥലത്തു നിന്നും പുറത്തേയ്ക്ക് ഇറങ്ങിയെത്തിയതായിരുന്നു ടിപ്പർ ലോറി. ഈ സമയം ലോറിയുടെ നിയന്ത്രണം നഷ്ടമായി കാൽനടയാത്രക്കാരനെ ഇടിച്ചു വീഴ്ത്തുകയായിരുന്നു. ഇടിയുടെ ആഘാതത്തിൽ കാൽനടയാത്രക്കാരന്റെ തലയിലൂടെ ലോറിയുടെ ചക്രങ്ങൾ കയറിയിറങ്ങി. ഇദ്ദേഹത്തിന് ദാരുണമായി അന്ത്യം സംഭവിക്കുകയായിരുന്നു. അപകടത്തെ തുടർന്ന് റോഡിൽ രക്തം അടക്കം ചിതറിക്കിടന്നു. അപകടം കണ്ട് ഡ്രൈവർ ടിപ്പർ ലോറിയിൽ നിന്നും ഇറങ്ങി ഓടി രക്ഷപെട്ടു. മരിച്ച തങ്കപ്പന്റെ മൃതദേഹം കോട്ടയം മെഡിക്കൽ കോളേജ് ആശുപത്രി മോർച്ചറിയിൽ. സംഭവത്തിൽ ഏറ്റുമാനൂർ പൊലീസ് കേസെടുത്തു.
