കുട്ടികളെ സ്കൂളിലാക്കി വരുന്ന വഴി അറ്റാക്ക് വന്നു; കുടമാളൂർ സ്വദേശിക്ക് ദാരുണാന്ത്യം

കോട്ടയം: കോട്ടയം നഗരത്തിൽ ബസേലിയസ് കോളേജിന് സമീപം വെള്ളാപ്പള്ളി പമ്പിൽ കുടമാളൂർ സ്വദേശി അറ്റാക്ക് വന്ന് മരിച്ചു. കുടമാളൂർ സ്വദേശി പുള്ളിമ്പറമ്പിൽ വീട്ടിൽ ബിജു പി പി (50) ആണ് മരിച്ചത്. ഇന്ന് ഉച്ചയ്ക്ക് 12 മണിയോട് കൂടിയായിരുന്നു സംഭവം. ലൂർദ് സ്കൂളിൽ രണ്ട് കുട്ടികളെ വിട്ടതിനുശേഷം തിരികെ വരുമ്പോഴായിരുന്നു സംഭവം.

വരുന്ന വഴിയിൽ ദേഹാസ്വാസ്യം ഉണ്ടാവുകയും ഉടൻതന്നെ തൊട്ടടുത്തുള്ള വെള്ളാപ്പള്ളി പമ്പിൽ കയറി ശുചിമുറിയിൽ പോയി തിരികെ വന്ന് കാറിൽ കിടക്കുകവേയാണ് മരണം സംഭവിച്ചത്. കാറിനുള്ളിൽ വച്ച് തന്നെ മരണം സംഭവിച്ചിരുന്നു. ഇദ്ദേഹത്തിന് രണ്ടുവർഷം മുമ്പ് ബൈപ്പാസ് നടത്തിയിരുന്നതായി ബന്ധുക്കൾ പറഞ്ഞു. വീടിന് തൊട്ടടുത്തുള്ള മറ്റൊരു വീട്ടിൽ കാർ ഡ്രൈവറായി ജോലിചെയ്ത് വരികയായിരുന്നു ഇദ്ദേഹം.

ആ വീട്ടിലെ രണ്ടു കുട്ടികളെ സ്കൂളിൽ എത്തിച്ച് മടങ്ങുന്ന വഴിയിലാണ് മരണം സംഭവിച്ചത്. ഉടൻതന്നെ പോലീസും 108 ആംബുലൻസും സംഭവസ്ഥലത്ത് എത്തുകയും ജില്ലാ ജനറൽ ആശുപത്രിയിലേക്ക് മാറ്റുകയും ചെയ്തു. ഭാര്യയും രണ്ട് മക്കളുമാണ് ഇദ്ദേഹത്തിനുള്ളത്. മൂന്നു വർഷങ്ങൾക്കു മുമ്പ് കോട്ടയം തിരുനക്കര അമ്പലത്തിന് സമീപം ഓട്ടോ ഓടിച്ചിരുന്നു. എന്നാൽ പിന്നീട് ആരോഗ്യകാരണങ്ങളാൽ മാറുകയായിരുന്നു.