ആലപ്പുഴ: കുടുംബശ്രീയുടെ ‘കേരള ചിക്കൻ പദ്ധതി’ ആലപ്പുഴയിലും. അടുത്തമാസം ഔട്ട്ലെറ്റുകളും ഫാമുകളും തുറക്കുന്നരീതിയിലാണ് പ്രവർത്തനം. ജില്ല കുടുംബശ്രീ മിഷന്‍റെ നേതൃത്വത്തിൽ സുരക്ഷിതവും സംശുദ്ധവുമായ കോഴിഇറച്ചി ലഭ്യമാക്കുകയാണ് ലക്ഷ്യമെന്ന് കുടുംബശ്രീ ജില്ല പ്രോഗ്രാം മാനേജർ ശ്രീപ്രിയ പറഞ്ഞു. നിലവിൽ മാർച്ചിൽ തുടങ്ങണമെന്ന രീതിയിലാണ് കാര്യങ്ങൾ പുരോഗമിക്കുന്നത്. വിപണകേന്ദ്രവും ഫാമുകളും തിട്ടപെടുത്തുന്നതിന് ഈമാസം 20ന് ആലപ്പുഴയിൽ കുടുംബശ്രീ സംസ്ഥാന മിഷൻ യോഗം വിളിച്ചിട്ടുണ്ട്.
ഈയോഗത്തിൽ സർവേയിൽ കണ്ടെത്തിയ ഫാമുകളടക്കമുള്ള കാര്യങ്ങളിൽ തീരുമാനമാകും. ജില്ലയിൽ നിലവിൽ 34 ഫാമുകൾ ആയിട്ടുണ്ട്. അത് 80 ആക്കി ഉയർത്തും. കുറഞ്ഞത്‌ 1000 കോഴികളെ വളർത്താവുന്ന റോഡുകളോട് ചേർന്ന ഫാമുകളാണ്‌ വേണ്ടത്‌. അടിസ്ഥാനസൗകര്യമൊരുക്കുന്നതിന് 1200 ചതുരശ്രയടി വിസ്‌തീർണം വേണം. ഫാമുകൾ നിശ്ചയിക്കേുന്നതോടെ ജില്ലയിലെ വിപണനകേന്ദ്രത്തിന്‍റെ എണ്ണവും തിട്ടപെടുത്തും.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
പൊതുവിപണിയിൽ കോഴിയിറച്ചി വിലക്കയറ്റം നിയന്ത്രിക്കാനും ഗുണമേന്മയുള്ള ഇറച്ചി ലഭ്യമാക്കാനും ലക്ഷ്യമിട്ട് 2017 ലാണ് കേരള ചിക്കൻ പദ്ധതി ആരംഭിച്ചത്.
കുടുംബശ്രീ അംഗങ്ങളായ കോഴി കർഷകർക്ക് സ്ഥിരവരുമാനം ഉറപ്പുവരുത്തുന്ന പദ്ധതി മൃഗസംരക്ഷണ വകുപ്പ്, കേരള സ്റ്റേറ്റ് പൗൾട്രി ഡവലപ്മെന്റ് കോർപറേഷൻ എന്നിവയുമായി സഹകരിച്ചാണ് നടപ്പാക്കുന്നത്. കുടുംബശ്രീ ബ്രോയിലർ ഫാർമേഴ്സ് പ്രൊഡ്യൂസർ കമ്പനിയാണ് പ്രവർത്തനം ഏകോപിക്കുന്നത്. സംസ്ഥാനത്തെ എല്ലാജില്ലയിലും 80 വീതം കേരള ചിക്കൻ ഔട്ട്ലെറ്റുകൾ തുറക്കുകയാണ് ലക്ഷ്യം. നിലവിൽ സംസ്ഥാനത്തെ എട്ട് ജില്ലകളിലായി 104 വിപണനകേന്ദ്രങ്ങളിലായി 328 ബ്രോയ്‌ലർ ഫാമുകളുമുണ്ട്. ഇവയിലൂടെ പ്രതിദിനം 24,000 കിലോ കോഴിയിറച്ചി വിൽക്കുന്നുണ്ടെന്നാണ് കണക്ക്.
അഞ്ച് വർഷത്തിനിടെ 150 കോടിയുടെ വിറ്റുവരവാണ് കമ്പനിക്ക് കിട്ടിയത്. 297 വനിതകർഷകരും ഇതിന്‍റെ ഭാഗമായി പ്രവർത്തിക്കുന്നു. ഇതുമുഖേന 400 കുടുംബങ്ങൾക്ക് സ്ഥിരവരുമാനവും ലഭ്യമാക്കുന്നുണ്ട്. എറണാകുളത്ത് 25 ഔട്ട്ലെറ്റും 55 ഫാമും കോട്ടയത്ത് 21 ഔട്ട്ലെറ്റും 50 ഫാമും കൊല്ലത്ത് 16 ഔട്ട്ലെറ്റും 49 ഫാമും തൃശൂർ 16 ഔട്ട് ലെറ്റും 47 ഫാമും തിരുവനന്തപുരത്ത് 15 ഔട്ട്ലെറ്റും 48 ഫാമും കോഴിക്കോട് 10 ഔട്ട്ലെറ്റും 41 ഫാമും പാലക്കാട് 13ഉം മലപ്പുറത്ത് 25 ഫാമും നിലവിൽ പ്രവർത്തിക്കുന്നുണ്ട്.
