ലോക്കറ്റ് കുടുക്കി! പുലിനഖം കൊണ്ടുള്ള ലോക്കറ്റ് ധരിച്ച ബിഗ്ബോസ് മത്സരാർഥി അറസ്റ്റിൽ

ശ്രീജേഷ് സി. ആചാരി 

ബംഗളൂരു: പ്രമുഖ റിയാലിറ്റി ഷോയായ ബിഗ് ബോസ്സിന്റെ കന്നഡ പതിപ്പിൽ നാടകീയ രംഗങ്ങൾ.പുലിയുടെ നഖംകൊണ്ട് നിർമ്മിച്ച ലോക്കറ്റ് ധരിച്ച വർത്തൂർ സന്തോഷ് എന്ന മത്സരാർഥിയെ വനംവകുപ്പ് അറസ്റ്റ് ചെയ്തു.പരിപാടിയുടെ സെറ്റിലെത്തിയായിരുന്നു അറസ്റ്റ് രേഖപ്പെടുത്തൽ

കഴിഞ്ഞ ദിവസങ്ങളിൽ പുറത്ത് വന്ന ബിഗ് ബോസ്സിന്റെ എപ്പിസോഡുകളിൽ 

വർത്തൂർ സന്തോഷ് കഴുത്തിൽ പുലിയുടെ നഖം ഘടിപ്പിച്ച ലോക്കറ്റ് ധരിച്ചിരിക്കുന്ന ദൃശ്യങ്ങൾ പുറത്തുവന്നിരുന്നു.ഇത് ശ്രദ്ധയിൽപ്പെട്ട വനം വകുപ്പ് താരത്തിനെതിരെ എഫ്ഐആർ രജിസ്റ്റർ ചെയ്ത് അന്വേഷണം ആരംഭിക്കുകയായിരുന്നു.

തുടർന്ന് ബിഗ്ബോസ്സിന്റെ സെറ്റിലെത്തിയ വനംവകുപ്പ് ഉദ്യോഗസ്ഥർ താരത്തിന്റെ ലോക്കറ്റ് പരിശോധിച്ച ശേഷം അറസ്റ്റ് രേഖപ്പെടുത്തുകയായിരുന്നു.അറസ്റ്റ്‌ രേഖപ്പെടുത്തുന്നതിന് മുമ്പ് രാമോഹള്ളി ഫോറസ്റ്റ് ഓഫീസർമാരുമായി വാക്കുതർക്കത്തിലേർപ്പെട്ട വർത്തൂർ സന്തോഷിനെ ബിഗ് ബോസ് ഹൗസിൽ നിന്ന് അധികൃതർ പുറത്താക്കുകയും ചെയ്തു.

വന്യജീവി സംരക്ഷണ നിയമം ലംഘിച്ച് പുലിയുടെനഖങ്ങൾ കൊണ്ട് നിർമ്മിച്ച ലോക്കറ്റ് ധരിച്ചെന്ന കുറ്റമാണ് സന്തോഷിനുമേൽ ചുമത്തിയിരിക്കുന്നത്.

 നിലവിൽ ചോദ്യം ചെയ്തുകൊണ്ടിരിക്കുന്ന താരത്തെ

ഇന്ന് തന്നെ മജിസ്‌ട്രേറ്റിന് മുന്നിൽ ഹാജരാക്കിയേക്കുമെന്നാണ് ഇപ്പോൾ ലഭിക്കുന്ന വിവരം.കേസിൽ കുറ്റക്കാരനാണെന്ന് തെളിഞ്ഞാൽ സന്തോഷിന് മൂന്ന് മുതല്‍ എഴുവര്‍ഷം വരെ തടവുശിക്ഷ അനുഭവിക്കേണ്ടി വരും.