പ്രണയപ്പക കവർന്നെടുത്തത് രണ്ട് ജീവനുകൾ ; തിക്കോടിയില്‍ യുവതിയെ തീ കൊളുത്തിയശേഷം ആത്മഹത്യയ്ക്ക് ശ്രമിച്ച യുവാവും മരിച്ചു

തിക്കോടി : യുവതിയെ തീ കൊളുത്തിയശേഷം ആത്മഹത്യയ്ക്ക് ശ്രമിച്ച യുവാവും മരിച്ചു.പെട്രോള്‍ ഒഴിച്ച്‌ തീ കൊളുത്തിയതിനെ തുടര്‍ന്ന് ഗുരുതരമായി പൊള്ളലേറ്റ തിക്കോടി പള്ളിത്താഴം സ്വദേശി നന്ദകുമാര്‍ (30) ആണ് മരിച്ചത്.

കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയിലായിരുന്ന യുവാവ് പുലര്‍ച്ചെ രണ്ടു മണിക്കാണ് മരിച്ചത്. ഇയാള്‍ പെട്രോള്‍ ഒഴിച്ച്‌ തീകൊളുത്തിയ തിക്കോടി പഞ്ചായത്തിലെ താല്‍കാലിക ജീവനക്കാരി കൃഷ്ണപ്രിയ (23) ഇന്നലെ ആശുപത്രിയിൽ മരിച്ചിരുന്നു.

വെള്ളിയാഴ്ച രാവിലെ 10ന് തിക്കോടി പഞ്ചായത്ത് ഓഫിസിനു മുന്നില്‍വച്ചായിരുന്നു സംഭവം.
കൃഷ്ണപ്രിയയുമായി സംസാരിച്ചുകൊണ്ടിരിക്കുന്നതിനിടെ, നന്ദകുമാര്‍ കയ്യിൽ കരുതിയ ആയുധം ഉപയോഗിച്ച് കൃഷ്ണ പ്രിയയെ കുത്തിയ ശേഷം കയ്യില്‍ തന്നെ കരുതിയ കുപ്പിയില്‍നിന്നും പെട്രോള്‍ കൃഷ്ണപ്രിയയുടെ ശരീരത്തിലേക്ക് ഒഴിക്കുകയായിരുന്നു.

ശേഷം ബാക്കി പെട്രോള്‍ സ്വന്തം ശരീരത്തിലേക്ക് ഒഴിച്ച ശേഷം ഇയാൾ തീകൊളുത്തി. പ്രണയനൈരാശ്യമാണ് അതിക്രമത്തിന് കാരണമെന്നാണ് സൂചന.